Prezıdent • 03 Maýsym, 2019

Qasym-Jomart Toqaev jumys saparymen Jambyl oblysyna keldi

827 ret kórsetildi

Qazaqstan Respýblıkasynyń Prezıdenti Qasym-Jomart Toqaev jumys saparymen Jambyl oblysyna keldi. Áýeli Memleket basshysy «Qazfosfat» jaýapkershiligi shekteýli seriktestiginiń «Mıneraldy tyńaıtqyshtar» zaýytyna atbasyn buryp, atalǵan kásiporynnyń tynys-tirshiligimen tanysty.

  Qazaqstan Respýblıkasynyń Indýstrıaldy-ınnovasııalyq damý memlekettik baǵdarlamasynyń sheńberinde júzege asyrylǵan hımııalyq zaýyt aýyl sharýashylyǵy úshin ftorsyzdandyrylǵan mıneraldy tyńaıtqysh shyǵarady. Prezıdentke óndiristiń qazirgi kórsetkishteri men eksport kólemin ulǵaıtý jóninde esep berildi. Sonymen qatar, «Qazfosfat» jaýapkershiligi shekteýli seriktestiginiń bas dırektory, Qazaqstannyń Eńbek Eri Muqash Eskendirov 2016 jyly júrgizilgen zaýytty qaıta jabdyqtaý jumystary óndiris kólemin eki esege ulǵaıtýǵa múmkindik bergenin atap ótti. Jambyl oblysyna sapary barysynda Qasym-Jomart Toqaevqa aǵymdaǵy jyldyń basynan beri zaýyttyń 29,1 mıllıard teńgeniń ónimin óndirgeni baıandaldy. Onyń ishinde 24 myń tonna azot tyńaıtqyshy bolsa, 122 myń tonnaǵa jýyq fosfor tyńaıtqyshy óndirilgen. О́nim ishki naryqty tolyq qamtamasyz ete otyryp, Amerıka Qurama Shtattary, Qytaı, Birikken Arab Ámirlikteri, Reseı elderine eksporttalady. Búgingi tańda atalǵan kásiporynda barlyǵy 1 myńnan astam adam jumys atqaratyn bolsa, onyń ishinde 344 áıel adamdar bar. Aıta keteıik, elimiz boıynsha Jambyl oblysy hımııa salasynyń damyǵan aımaǵynyń birinen sanalady. О́ńirdiń hımııa ónerkásibin damytý salasyndaǵy áleýeti joǵary. Hımııa salasy óńirdiń búkil ónerkásip óndirisiniń 20 paıyzdan astamyn quraıdy. Qazirgi kezde aımaqta zamanaýı hımııa klasterin qurý jóninde jumystar atqarylýda. Sonymen qatar, Qarataý jáne Jańatas qalalaryndaǵy jobalardy, «Hımpark-Taraz» arnaıy ekonomıkalyq aımaǵyn iske qosý arqyly oblystyń ónerkásip óndirisiniń kólemin edáýir arttyrý sharalary qolǵa alynǵan.

  Jambyl oblysyna jumys sapary barysynda Prezıdent Qasym-Jomart Toqaev Halyq Qaharmany Ǵazız Baıtasovtyń shańyraǵyna bardy. Taraz qalasynda asa qaýipti lańkes qylmyskerdi quryqtaý barysynda qaza tapqan batyrdyń jary men balalarynyń jaǵdaıymen tanysqan Memleket basshysy olardyń qajettilikterine de kóńil bóldi. Qasym-Jomart Kemeluly Ǵazız Baıtasovtyń eren erliginiń búgingi urpaqqa úlgi-ónege ekendigin atap ótip, batyr esiminiń el jadynda máńgi saqtala beretinin jetkizdi. Qazaqstan Prezıdentine qyzmet barysynda erlikpen qaza tapqan Ǵazız Baıtasovtyń qurmetine qoıylǵan eskertkish taqta, fotosýretteri, medaldary men jeke zattary kórsetildi. Qaharmandyqtyń úlgisin kórsetken Ǵazız Baıtasovtyń atyna Taraz qalasynan kóshe berilip, turǵan úıine eskertkish taqta qoıylǵan bolatyn.

  Jambyl oblysyna jumys sapary barysynda Qazaqstan Respýblıkasynyń Prezıdenti Qasym-Jomart Toqaev Taraz qalasyndaǵy «Kóne Taraz» tarıhı-mádenı ortalyǵynda boldy. Munda Memleket basshysy «Kóne Taraz» kesheniniń saıabaǵy aýmaǵynan arheologııalyq qazba jumystary barysynda tabylǵan eksponattarmen tanysty. Atalǵan ortalyqta 20 gektar alqapta sholý munarasy, «Dostyq úıi» men kongress-holly bar mádenı ortalyq, «Taraz sazdary» stellasy, «Myńbulaq» saıabaǵy, qazba jumystary barysynda tabylǵan eksponattar qoıylǵan mýzeı nysany ornalasqan. Tabylǵan, qoıylǵan kóne zattardyń bári de naqyshyna keltirilip salynǵan oıý-órnekke baı ári qoldan jasalǵan. Bul jerde altyn jáne kúmis tıyndar, qysh ydys-aıaqtar, qysh qubyr júıeleri men ózge ortaǵasyrlyq jádigerlerdi ataýǵa bolady. «Kóne Taraz» tarıhı-mádenı ortalyǵy Qazaq handyǵynyń 550 jyldyǵyna oraı ashylǵan mańyzdy nysannyń biri. Atalǵan ortalyqqa ótken jyly 145 myńnan astam týrıst kelse, aǵymdaǵy jyldyń birinshi toqsanynda 16 myń kelýshi Taraz tarıhymen tanysqan.

  Memleket basshysy Qasym-Jomart Toqaev atalǵan ortalyqqa taıaý «Shahrıstan» tarıhı-mádenı kesheninde boı kóteretin nysandardyń eskızderimen tanysty. Prezıdentke «Shahrıstan» kesheni aýmaǵynda aldaǵy ýaqytta kórkem sýret galereıasy, ólketaný mýzeıi, kórme zaly jáne rýhanııat ortalyǵy, arbat, qolóner sheberhanasy, amfıteatr, sonymen qatar kólemdi saǵat stellasy sııaqty nysandardyń boı kóteretindigi týraly baıandaldy. Olardyń qurylys jumystary aǵymdaǵy jyly 25 mamyrdan bastalyp ta ketti.

  Memleket basshysy Qasym-Jomart Toqaev «Araı Plaza» kesheninde ótken qorytyndy jıynǵa qatysyp, óńirdiń bilim, densaýlyq saqtaý sııaqty ózge de mańyzdy salalaryna toqtaldy. Jambyl oblysynda atqarylyp jatqan birqatar jumystarǵa oń baǵasyn berdi. Alaıda, oblystaǵy qylmys kólemin azaıtýǵa kúsh salý kerektigin de basa aıtty. « Oblystaǵy qylmys kólemin azaıtý kerek. Qazaq amandasqanda «Mal-jan aman ba?» dep jón surasqan. Degenmen, sońǵy kezde qoradaǵy malyn tappaı qalatyn azamattar kóbeıip barady. О́tken jyly elimizde 5,5 myń mal urlyǵy tirkelgen. Urlyq jaqsylyqqa aparmaıdy! Buǵan tyıym salý kerek! Adal eńbek etip, kúnin kórip otyrǵan malshylardy qorǵaýymyz qajet! Zańdy qataıtyp, qylmyskerlerdi sybaılastarymen qosyp, qatań jazalaý kerek. Ishki ister mınıstrligi qyzmetkerlerimen kezdesýde osy máselege qatysty naqty tapsyrmalar berdim. Sondyqtan, ákimdikter men jergilikti polısııa barymtaǵa qarsy shuǵyl sharalar qabyldaýy tıis. Qylmystyq kodekske tıisti ózgertýler engizý qajet. Parlament depýtattary osy bastamany qoldap, máseleniń oń sheshim tabýyna atsalysady dep senemin», dedi Prezıdent.

  Budan keıin Qasym-Jomart Toqaev esirtki qylmysynyń ýshyǵýy jaıyna da toqtaldy. «Oblystaǵy kelesi ótkir másele – esirtki qylmysynyń ýshyǵýy. Bul – búkil qoǵamdy alańdatqan ózekti másele. О́kinishke qaraı, qazirgi ozyq tehnologııa damyǵan zamanda «esirtki bıznesiniń» dáýreni júrip tur. Esirtki satatyn «astyrtyn» jarnamalar qaptap ketti. Tipti, arnaıy saıttar ashylǵan. Bul, eń aldymen, jastardyń sanasyn jáne el densaýlyǵyn ýlaıtyn kesel. Muny toqtatý qajet! Jol bermeý kerek! Zań júzinde tosqaýyl qoıýymyz asa mańyzdy! Esirtki satýdy kásipke aınaldyrǵan qylmyskerler qatań jazalanýy kerek! Polısııa qyzmetkerlerine osy másele boıynsha shuǵyl sharalar qabyldaýdy tapsyramyn», dedi Memleket basshysy. Sonymen qatar, óńirde týrızm ındýstrııasyn damytýdyń mańyzdylyǵyn eskerip, Jambyl oblysynyń ákimi Asqar Myrzahmetovke Almaty, Túrkistan jáne Jambyl oblystaryn baılanystyratyn «Jańa Jibek joly» ekspedısııalyq marshrýtynyń týrıstik ınfraqurylymyn damytýdy tapsyrdy. «Álemdegi árbir onynshy jumys orny týrızm salasymen baılanysty. Bul baǵytqa erekshe kóńil bólý kerek. О́ńirde týrısterdi qyzyqtyratyn tarıhı oryndar jetkilikti. Bes nysanǵa IýNESKO tarapynan halyqaralyq mártebe berilgen ejelgi qalashyqtar: Aqtóbe-Balasaǵun, Qulan, О́rnek, Qostóbe, Aqyrtas. Jambyl jerindegi Aısha bıbi jáne Qarahan keseneleri, Jaısań kıeli jeri, Kóksaı shatqaly jáne basqa da tarıhı oryndar – halqymyz úshin ortaq mádenı qundylyqtar. Úkimet týrızm salasyn damytýdyń memlekettik baǵdarlamasyn qabyldaýda. Oǵan eń mańyzdy 10 týrıstik nysan kiredi. Onyń ekeýi Almaty óńiriniń taý klasteri. Al, Túrkistannyń tarıhı-mádenı týrıstik ortalyǵy Jambyl oblysymen shekaralas ornalasqan. О́ńirdiń tarıhı-mádenı mańyzyn eskere otyryp, Jambyl oblysynyń ákimine úsh oblys aýmaǵymen ótetin «Jańa Jibek joly» ekspedısııalyq marshrýtynyń (Almaty, Túrkistan, Jambyl) týrıstik ınfraqurylymyn damytýdy tapsyramyn. Aımaqtyń týrıstik qýatyn arttyryp, ınvestısııa tartý úshin júıeli sharalar qabyldaý qajet. Úkimet pen ákimdik bul salany birlese damytýǵa kúsh salýy kerek», dedi Prezıdent Qasym-Jomart Toqaev. Sonymen qatar, jurtshylyqpen kezdesý barysynda Qasym-Jomart Kemeluly «Prezıdent retinde men úshin basty mindet – bıliktiń halyq aldyndaǵy jaýapkershiligin arttyrý», dep atap ótti.

  Prezıdentpen kezdesý barysynda Jambyl oblystyq máslıhatynyń depýtaty Meırambek Tólepbergen eńbek qaýipsizdigin saqtaý týraly aıtsa, kásipker Anar Beksultanova I jáne II toptaǵy múmkindigi shekteýli azamattarǵa nesıe berilmeıtini týraly másele kóterdi. Sonymen qatar, Baızaq aýdany Ǵ.Muratbaev atyndaǵy gımnazııanyń bıologııa pániniń muǵalimi Evgenıı Kravchýk, «Biz birgemiz» volonterlar qozǵalysynyń tóraǵasy Ýálıhan Bolatbek memlekettiń jastarǵa jasap otyrǵan qamqorlyǵy jóninde áńgimelese, Taraz ınnovasııalyq-gýmanıtarlyq ýnıversıtetiniń rektory Erbolat Saýryqov ǵylym salasyn ilgeriletý týraly oıymen bólisti. О́z sózinde Qazaqstan Prezıdenti Qasym-Jomart Toqaev jaryssózge shyqqan azamattardyń usynysy oryndy ekenin, tıisti máseleler boıynsha Úkimetke tapsyrma beriletinin atap ótti. Jıyn sońynda Qazaqstan Respýblıkasynyń Prezıdenti Qasym-Jomart Toqaev eńbekte tabysqa jetken birqatar azamattardy Alǵys hatpen marapattap, Jambyl oblysyndaǵy jumys saparyn qorytyndylady.


Jambyl oblysy

 

Sońǵy jańalyqtar

Almatyda eki kóshe jartylaı jabylady

Aımaqtar • Búgin, 16:48

Bıyl mektep formasy ózgermeıdi

Bilim • Búgin, 16:14

Dollar qymbattady

Ekonomıka • Búgin, 15:54

Jetisý oblysynyń TJD basshysy taǵaıyndaldy

Taǵaıyndaý • Búgin, 15:08

Aralda jol apatynan bir adam kóz jumdy

Oqıǵa • Búgin, 11:35

Qazaqstannyń eksport kólemi artty

Ekonomıka • Búgin, 09:52

Uqsas jańalyqtar