Rýhanııat • 06 Maýsym, 2019

Álemniń qylqalam sheberleri – Altaıda

894 ret kórsetildi

Álemniń 10 memleketiniń (Germanııa, Fransııa, Túrkııa, Lıtva, Grýzııa, Tatarstan, О́zbekstan, Ázerbaıjan, Qyrǵyzstan, Qazaqstan) 20 sýretshisi ór Altaıdyń tórine – Katonqaraǵaı aýdanyna keldi. Dúnıe júziniń túkpir-túkpirinen Altaıǵa asyǵa jetken qylqalam sheberleri 4-11 maýsym aralyǵynda tabıǵaty kórkem mekendegi «Rahman qaınary» shıpajaıynyń mańynda jumys istemek.

«Uly dala palıtrasy» dep atalǵan plener «Rýhanı jańǵyrý» baǵdarlamasy jáne «Uly dalanyń jeti qyry» maqa­lasynyń aıasynda aımaq basshysy Danıal Ahmetovtiń bastamasymen, ob­lys­tyq mádenıet, muraǵattar jáne qu­jattama basqarmasy men О́ner mýzeıiniń uıytqy bolýymen ótkizilip jatyr. Bul plener byltyr óńirdiń Ulan aýda­nyndaǵy Taıynty kóliniń mańynda respýblıkalyq deńgeıde qolǵa alynsa, bıyl alǵash ret halyqaralyq dárejede uıymdastyrylyp otyr. «О́tken jyly plenerdi «Altaı – Qazaqstannyń injý-marjany» taqyrybynda ótkizgende elimizdiń 20-ǵa jýyq sýretshisi qatysqan edi. Sonyń nátıjesinde О́skemendegi О́ner mýzeıiniń qory 100-den astam kartınamen tolyqty. Bıyl álem sýretshileri Katonqaraǵaıdaı tarıhı mekenniń aýrasyn jan-tánimen sezinip, keremet týyndylar dúnıege ákeledi degen úmitimiz bar. Sýret ónerine aýdarma qajet emes. Parıj ben Berlınnen, Tbılısı men Qazannan, Vılnıýs pen Ankaradan kelgen qylqalam sheberleriniń arqasynda uly dalanyń uly tarıhy halyqaralyq kórmelerde sýret tilinde sóıleıtin bolady. Sharany ótkizýdegi maqsatymyz – óńirimizdiń ǵajap tabıǵaty men tamyryn tereńnen alatyn tarıhyn álemge pash etý», dedi oblys ákiminiń orynbasary Ásem Núsipova plenerdiń bastalýyna oraı ótkizilgen baspasóz máslıhatynda.

Sharanyń úılestirýshisi, belgili sýretshi Esenǵalı Sadyrbaev Altaı tabı­ǵaty qylqalam sheberlerine ózge­she shabyt syılaıtynyna senimdi. «Altaı – túrki áleminiń altyn besigi. Álemniń túkpir-túkpirinde Altaıǵa qushtar, Altaıdy bir kórýdi armandap júrgen jandar kóp. Bizdiń sheteldik áriptesterimizge osyndaı úlken múm­kindik týyp otyr. Altaıǵa baratyn jıyr­­­ma sýretshiniń qoltańbasy 20 túrli. Endeshe, jaqsy týyn­dy kútińizder», deıdi ol.

Germanııa atynan kelgen sýretshi Bolat Mekebaev Kókshetaýda týǵan eken. 1997 jyly ózge elge qonys aýdarǵan qyl­qalam sheberi «Men qazaqpyn. Búgin erekshe qýanyp turmyn. О́ıtkeni Ota­nyma keldim» deı kele, óziniń álem halyqtary óneri halyqaralyq qaýymdastyǵynyń prezıdenti qyzmetin atqaratyndyǵyn aıtyp, qaýymdastyq aıasynda qazaq óneri men mádenıetin de únemi nasıhattap júretinin jetkizdi. «Nemis halqyn meni qushaǵyn jaıa qarsy alǵany úshin qurmetteımin. Qytaı halqyn tamyry tereń tarıhy, Italııany óneri úshin qadirleımin. Biraq men tek óz halqymdy, qazaq elin súıemin. Jýrnalısterge suhbat bergende osyny únemi aıtyp júremin», deıdi Almanııadan kelgen alashtyń balasy. Tatarstan Respýblıkasy jas sýretshiler shyǵarmashylyq birlestiginiń jetekshisi Ilnýr Sırazıev: «Qazaqstanda osyndaı jobalardyń qolǵa alynyp jatqanyna qýanyshtymyn. Bul sapar qazaq eliniń tarıhymen, salt-dástúrimen tanysýǵa mol múmkindik beredi dep oılaımyn. Uıymdastyrýshylar áıgili «Berel» mýzeıine, patshalar jazyǵyna ekskýrsııa jasaımyz dep otyr. Altaı tabıǵaty bizge shalqar shabyt syılaıtynyna kúmánimiz joq» dep óz lebizin jetkizdi.

Qorytyndy kórme 13 maýsymda О́skemendegi óner mýzeıinde bolady. Vernısaj aıaqtalǵannan keıin plener qatysýshylary «Jastar» saıabaǵynda jas sýretshilerge sheberlik sabaǵyn ótkizedi.

 

О́SKEMEN

 

Sońǵy jańalyqtar

Uqsas jańalyqtar