Syrt alańdaǵy kezdesý aldynda Qazaqstan quramasy sapyndaǵy negizgi oıynshylar Iýrıı Logvınenko, Dmıtrıı Shomko, Baqtııar Zaınýtdınov, Azat Nurǵalıev, Aleksandr Merkel jaraqat alyp, áriptesterine kómektese almady. Árıne búkil match boıy olardyń orny oısyrap, quramada joq ekeni birden baıqaldy. Tipti alǵashqy eki goldyń ekeýi de qorǵaýshylardyń qateliginen soǵyldy. Belgııaǵa qarsy kezdesý aldynda Mıhal Bılek jýrnalıstermen tildeskende negizgi quramnyń birneshe oıynshysy kómektese almaǵanymen, qalǵan oıynshylarǵa senetinin aıtyp, «FIFA reıtınginde kósh bastap kele jatqan komandamen oınaımyz. Jasyl alańǵa shyqqan fýtbolshylar qoldan kelgenniń bárin kórsetedi dep oılaımyn», degen edi. Ulttyq quramanyń naýryz aıynda ótkizgen eki matchymen salystyrǵanda bul kezdesýde Qazaqstan quramasynyń oıynshylar tiziminde asa qatty ózgeris baıqala qoıǵan joq. Tek ulttyq quramaǵa jańadan shaqyrylǵan «Qaısar» klýbynyń qorǵaýshysy Aleksandr Marochkın men el chempıonatynyń sońǵy týrynda gol soǵyp, kózge túsip júrgen «Ordabasynyń» shabýylshysy Toqtar Jańǵylyshbaıdyń birinshi mınýttan bastap alańǵa shyqqany azdap tańdandyrdy. Qaqpany qorǵaý ádettegideı «Ordabasy» qaqpashysy Dmıtrıı Nepogodovqa senip tapsyrylsa, ortalyq qorǵaýshy bolyp «Ordabasynyń» eki oıynshysy Temirlan Erlanov pen Sergeı Malyı shyqty. Sol qaptalda Iаn Vorogovskıı («Qaırat»), oń qaptalda Abzal Beısebekov («Astana») ornalasty. Al jartylaı qorǵanysta Iýrıı Persýh («Astana»), Islambek Qýat pen Georgıı Jýkov («Qaırat») jáne Maksım Fedın («Tobyl») oınady.
Matchtyń alǵashqy 10 mınýtynda eki qurama da bir-birin alystan baıqasyp júrdi. Al 11-mınýtta Belgııanyń alǵashqy qaýipti shabýyly birden golǵa aınaldy. Eden Azardyń qaptaldan áýelete asyrǵan dobyna birinshi Drıs Mertens jetip, esepti ashty. Arada nebári úsh mınýt ótkende alań ıeleri sapynan Tımotı Kastane mergendigimen kózge túsip, esepti 2:0-ge jetkizdi. Kezdesýdiń ekinshi bóliginde bas bapker Mıhal Bılek alańǵa shabýylda oınaǵan Toqtardyń ornyna Baýyrjan Islamhandy shyǵardy. Bapkerdiń basty maqsaty – Islamhan arqyly dopty ortada kóbirek ustap, óz aıyp alańymyzǵa dop jibermeý edi. Biraq 50-mınýtta Romelý Lýkaký qaqpamyzǵa úshinshi goldy saldy. Degenmen, Qazaqstan quramasynyń fýtbolshylary ekinshi taımda belsendi oınap, Kýrtýa qorǵaǵan qaqpaǵa qaýipti shabýyl uıymdastyrǵanyn da aıta keteıik. Eki taımnyń qorytyndysy boıynsha kezdesý 3:0 esebimen Belgııa quramasynyń jeńisimen aıaqtaldy.
«I» tobyndaǵy Qazaqstan-Belgııa matchynan bólek taǵy eki kezdesý ótti. Týrnır kestesinde ekinshi orynda turǵan Reseı quramasy óz alańynda San-Marıno fýtbolshylaryn oısyrata (9:0) jeńdi. Al Shotlandııa quramasy Kıprden 2:1 esebimen basym tústi. Úsh týrdan keıin Belgııa 9 upaımen kósh bastady. 6 upaıy bar Shotlandııa úshinshi, Kıpr men Qazaqstan quramasy úsh upaımen tórtinshi jáne besinshi orynda tur. Birde-bir upaıy joq San-Marıno kósh sońynda qalyp qoıdy. Aıta keteıik, Qazaqstan quramasy erteń elordadaǵy «Astana Arena» stadıonynda dál osy San-Marıno quramasyna qarsy oınaıdy. Match Nur-Sultan ýaqytymen keshki saǵat 20:00-de bastalady.
