Elimizdegi oryn alyp jatqan ártúrli saıası oqıǵa men reformanyń basynda – 9 maýsymda ótken Qazaqstan Respýblıkasynyń jańa prezıdentin saılaýy turǵany anyq. Bul – táýelsiz Qazaqstannyń jańa tarıhı dáýirge ótý jolyndaǵy jaýapty sát, qaıyrly qadam. Elimiz egemendik alǵanǵa deıin de, qasıetti Táýelsizdigimiz tuǵyryn nyqtaǵannan keıingi 30 jylǵa tarta ýaqytta da túrli saıası jaǵdaılardy, qıyndyqtardy basynan keshirdi. Sondaı syndarly sátte qazaqqa qazaqtyǵyn saqtap, búgingi álemdik arenadaǵy abyroıly ornyn belgileýde, myzǵymas yntymaǵymyzdy saqtap qalýda bizge qashanda aýyzbirshilik, salqyn aqyl men sabyr serik bolǵany anyq. Ultymyzdyń minezine tán osy bir qalybymyzdy qazir de joǵaltpaı, kerisinshe barlyǵymyz bir jaǵadan bas, bir jeńnen qol shyǵarýǵa umtylýymyz kerek. Sebebi qazir zaman almaǵaıyp, tez qubylǵysh. Biz sondaı turaqsyzdaý saıası ahýaldardyń ortasynda ómir súrip jatyrmyz. Jan-jaǵymyzdan qaýmalap, sál ǵana aıaǵymyzdy shalys basyp, múlt ketýimizdi ańdyp otyrǵandar aınalamyzda óte kóp. Sondaı sátte qyzbalyqqa salynýdyń qajeti joq. Tutas ult deńgeıindegi ózgeris bir sátte ornamaıdy. Asyǵys qadamnyń sońy keıin orny tolmas ókinishke alyp kelýi múmkin. Bul turǵydan bizge qaı kezde de tarıhtyń taýqymetti betteri sabaq bolyp, únemi táýbege túsirip otyrýy kerek dep esepteımin. Bizge alaýyzdyq emes, birlik kerek. Jastar bilimge umtylǵanda ǵana elimizdiń keleshegin kemel ete alady. Shúkir, qazir Táýelsizdik tárbıelegen erkin oıly, zııaly azamattar ósip kele jatyr. Ýaqyty kelgende eldiń erteńin, jarqyn keleshegin sózsiz biz jasaıtyn bolamyz. Sol úshin de búgingi beıbit ómirimizge táýbe dep, árbir qazaq ulttyń bolashaǵyn baıandy etýge umtylýy kerek. Al jeńistiń kilti – birlikte, bilimde. Táýelsizdik – ata-babalarymyzdyń bizge qaldyrǵan qasıetti amanaty. Osyny umytpasaq eken deımin.
Ádil AHMETOV,
Memlekettik syılyqtyń laýreaty, teatr jáne kıno akteri
