Nysanda chehııalyq óndiristiń zamanaýı peshteri ornatylǵan. Krematorıı dırektorynyń orynbasary Rýfat Hasanovtyń aıtýynsha, olardyń maksımaldy temperatýrasy 1100 gradýsqa deıin jetedi. Onyń sózinshe, qondyrǵylar eki kameradan turady: birinshisinde janý prosesi júredi, al ekinshisinde organıkalyq zattar tolyq ydyrap, qaýipsiz bıoorganıkalyq qaldyqtarǵa aınalady.
«Birinshi kamerada janý kezinde ushpa, keıde toksıkalyq zattar túziledi. Biraq ekinshi kamerada olardyń tolyq joıylýy júredi. Nátıjesinde qorshaǵan ortaǵa qaýip tóndirmeıtin bıoorganıkalyq qaldyqtar qalady», dedi Rýfat Hasanov.
Sondaı-aq ol krematorıı peshteri tańerteńnen bastap jumys isteıtinin, alaıda tútin baıqalmaıtynyn atap ótti. Nysanda zamanaýı súzgi júıesi qarastyrylǵan, sondyqtan ekologııalyq qaýip bolmaıdy dep sendirdi.
Krematorıı dırektory Ardaq Álishev qyzmetti alý tártibi týraly da túsinik berdi.
«Birinshi kezekte dárigerlik qaıtys bolý týraly kýálik qajet. Sondaı-aq notarıaldy rastalǵan jazbasha erik bildirý jáne jeke basyn kýálandyratyn qujattar bolýy tıis», dedi ol.
Atalǵan krematorıı qurylysy týraly másele buǵan deıin de birneshe ret kóterilip, qoǵamda qyzý talǵyǵa salynǵan.. 2022 jyly Almaty ákimdigi jobanyń iske qosylýy keıinge shegerilgenin habarlaǵan bolatyn. 2026 jyldyń basynda nysannyń jaqyn kúnderi ashylatyny aıtylsa, keıin bul merzim qaıta ózgergen edi.
Nurbolat AMANBEK
