Keńes músheleri Qazaqstan men Malaızııanyń iskerlik múmkindikteri týraly óz tájirıbelerimen bólisip, bızneske qoldaý kórsetý, ınvestısııalardy qorǵaý jáne otandyq, sheteldik kompanııalar úshin teń jaǵdaılardy qamtamasyz etý úshin qarjy quraldaryn jetildirýge baǵyttalǵan Qazaqstannyń saıasatyna erekshe nazar aýdardy.
Malaızııadaǵy Qazaqstan Elshisi Bolta Imanbaev is-shara qatysýshylaryn qarsy ala otyryp Kýala-Lýmpýr Qazaqstannyń Ońtústik Shyǵys Azııadaǵy negizgi saýda áriptesi ekenin atap ótti. 2018 jyldyń qorytyndysy boıynsha, qos memleket arasyndaǵy saýda-sattyq 4 ese ósip, 500 mln AQSh dollary shamasyn quraǵan. Sondaı-aq, qazirgi tańda, Qazaqstanda malaızııalyq kompanııalarmen jáne ınvestorlarmen birlestikte munaı-gaz, aýylsharýashylyq jáne qurylys salalarynda jalpy quny 1 mlrd AQSh dollaryna teń jobalar júzege asyrylyp jatqany týraly habardar etti.
B.Imanbaev Qazaqstan tarapy ıslamdyq qarjylandyrý, halal ındýstrııa, elektrondyq kommersııa, týrızm, densaýlyq saqtaý, aqparattyq qaýipsizdik tárizdi basym baǵyttar boıynsha ekijaqty áriptestikti nyǵaıtýǵa múddeli ekendigin jetkizdi.
Sonymen qatar QMIK-niń teń tóraǵalary Datýk Lý Djı men Dato Berikqazy Seksenbaev ıslamdyq qarjylandyrý, halal ındýstrııa, elektrondy kommersııa, týrızm, densaýlyq saqtaý, aqparattyq qaýipsizdik sııaqty perspektıvaly baǵyttar boıynsha ekijaqty yntymaqtastyqty tereńdetýge qyzyǵýshylyq tanytty. Olardyń pikirinshe, Iskerlik keńes ekijaqty saýda-ekonomıkalyq jáne ınvestısııalyq yntymaqtastyqtyń keshendi suhbat júrgizetin jáne eki eldiń isker toptary arasyndaǵy baılanystardy jandandyratyn tıimdi alań bolyp tabylady.
QMIK músheleriniń jumys kezdesýi aıaqtalǵannan keıin eki eldiń isker toptary ınvestısııalyq jáne saýda-ekonomıkalyq yqpaldastyqty odan ári nyǵaıtýǵa ýaǵdalasty.
