Sharaına
Seısenbi, 9 sáýir 2013 2:01
Eki úmitker de jeńdim dep esepteıdi
Chernogorııanyń joǵary memlekettik laýazymynan eki úmitker – eldiń qazirgi prezıdenti Fılıp Výıanovıch pen oppozısııadan kandıdat Mıodrag Lekıch jeksenbi kúni ótken saılaýda ózderiniń jeńiske jetkenderi týraly habarlady.
Seısenbi, 9 sáýir 2013 2:01
Eki úmitker de jeńdim dep esepteıdi
Chernogorııanyń joǵary memlekettik laýazymynan eki úmitker – eldiń qazirgi prezıdenti Fılıp Výıanovıch pen oppozısııadan kandıdat Mıodrag Lekıch jeksenbi kúni ótken saılaýda ózderiniń jeńiske jetkenderi týraly habarlady.
Výıanovıch tikeleı efır arqyly barlyq bıýlletenderdi sanaý qorytyndysynda óziniń 51,3 paıyz daýys jınaǵanyn, al onyń jalǵyz qarsylasynyń 48,7 paıyz daýys alǵanyn habarlaǵan. Al Lekıch bolsa óziniń 50,5 paıyz, al Výıanovıchtiń 49,5 paıyz daýys alǵanyn aıtýda. Oppozısııadan usynylǵan kandıdat sonymen birge, basqarýshy koalısııa ókilderiniń qazirgi ýaqytta jeńisti Výıanovıchqa áperý úshin saılaý okrýgteriniń birinde daýys berý qorytyndylaryn burmalaýǵa talpynys jasap jatqandyǵyn atap kórsetken. Chernogorııa saılaý komıssııasy bolsa ázirge eshqandaı resmı málimdeme jasaǵan joq.
Qus tumaýy basylmaı tur
Aspan asty eliniń jıyrma bir adamynyń qus tumaýynyń H7N9 atty jańa vırýsyn juqtyrǵany belgili boldy, olardyń altaýy qaıtys bolǵan kórinedi. Bul týraly Qytaı buqaralyq aqparat quraldaryna silteme jasaı otyryp, ITAR-TASS agenttigi habarlady.
Anhoı provınsııasynda tiri úı qustaryn satýmen aınalysatyn elý bes jasar er adam naýqastanǵan. Ol Bochjoý qalasynyń aýrýhanasyna jetkizilgen. Biraq, onymen qarym-qatynasta bolǵan adamdardyń eshqaısysynan aýrý belgileri anyqtalmaǵan kórinedi. Keshe Shanhaı bıligi jańadan naýqastanǵan eki adam týraly habarlaǵan. Qazirdiń ózinde qalada 98 myń taýyqtyń kózi joıylyp, úı qustaryn satýǵa tyıym salynǵan.
Japonııa soqqynyń betin qaıtarýǵa daıyn
Japonııa qorǵanys mınıstri Insýnorı Onodera eger Japonoıaǵa qater tóndirer bolsa, soltústikkoreıalyq zymyrandardy orta jolda atyp qulatý jóninde buıryq bergen.
Osy oraıda KHDR-dyń taıaý kúnderi zymyran ushyrý jóninde ýáde berip otyrǵandyǵyn aıta ketý kerek. Japonııa AEGIS ańdý júıesimen jáne alys qashyqtyqqa arnalǵan SM-3 zymyrandarymen jaraqtanǵan jaýyngerlik kemelerin shyǵara bastady. Sóıte tura, japon sarapshylary Soltústik Koreıanyń zymyran ushyrarlyq múmkindigi onsha emes dep esepteıdi, degenmen Tokıo kez kelgen kútpegen jaǵdaıǵa daıyn.
On bir bala qaza tapty
Aýǵan bıliginiń ókilderi men kýágerlerdiń aıtýlaryna qaraǵanda, NATO kúshteriniń Aýǵanstannyń shyǵysyna jasaǵan áýe soqqysy saldarynan on bir bala qaza tapqan. Sol sııaqty, taǵy bir áıeldiń ajal qushyp, alty adamnyń jaraqat alǵany týraly da aqparat bar.
Aýǵanstan prezıdenti Hamıd Karzaı beıbit turǵyndardy ajal qushtyrǵandardy aıyptady. Onyń ákimshiligi shyǵarǵan málimdemede el prezıdentiniń beıbit turǵyndar meken etken aýdandarda áýe soqqylaryn jasaýǵa tyıym salatyn jarlyqqa qol qoıǵany týraly aıtylǵan. Áýe soqqysyna ushyraǵan derevnıanyń turǵyndary men bılik ókilderi adamdardyń óz úılerinde otyrǵan kezde qaza tapqandaryn habarlap otyr.
Eks-prezıdent isi tergelýde
Brazılııa ókimeti belgili saıasatker, eldiń burynǵy prezıdenti Lýıs Inasıý Lýla da Sılvaǵa qatysty tergeý isin bastady. 2003-2011 jyldary memleket basshysy bolǵan adamǵa sybaılas jemqorlyqqa bardy degen aıyp taǵylyp otyr.
Tergeýdiń eks-prezıdenttiń saıasattaǵy bolashaǵyna teris áser etýi múmkin. Tergeý isiniń bastalýyna Portugal Telecom kompanııasy L. Lýla da Sılva prezıdent bolǵan birinshi merzimde «Eńbekshiler partııasyna» para berdi degen kúmán sebep bolyp otyr. Eks-prezıdent atalmysh partııaǵa ol qurylǵan 1980 jyldan bastap múshe bolyp tabylady.
Banderanyń eskertkishi qulatyldy
Ýkraınanyń Lvov oblysynda ýkraın ultshyly Stepan Banderaǵa ornatqan eskertkish qulatylǵan. Oqıǵa atalmysh oblystyń Kamenka-Býz aýdanyndaǵy Velıkosılkı selosynda oryn alǵan.
Aldyn ala belgili bolǵan málimet boıynsha, buzaqylar túnde Qanattyń jáne avtomashınanyń kómegimen bıýstti tuǵyrynan túsirip alǵan. Quqyq qorǵaý organdary qazirgi kezde oqıǵanyń qalaı bolǵanyn tekserýde. Osy rette oqıǵanyń mýnısıpaldyq saılaý kúni oryn alǵanyn da aıta ketý qajet.
Daýly araldarǵa týrıster baratyn boldy
Qytaı bıligi Ońtústik-Qytaı teńizindegi daýly sanalatyn Sısha araldaryna týrısterdiń barýyna ruqsat berdi. Bul araldar Qytaı, Vetnam jáne Taıvan elderi arasyndaǵy daýly aýmaq bolyp tabylady, degenmen 1974 jyldan beri is júzinde KHR bıliginiń quzyryna jatady.
Araldarda nebári bir ǵana qonaq úı bolǵandyqtan, týrısterge kemelerde ómir súrýge týra keledi. Sonymen birge, munda aýyz sý problemasynyń bar ekenin de aıtý kerek. 2000 jolaýshyǵa arnalǵan keme týrısterdi aralǵa ákelip turatyn bolady. Taıaý ýaqytta osyndaı taǵy bir keme jasalmaqshy. Alǵashqy týr mamyr merekelerine oraı jasalady dep kútilýde.
Ekvador prezıdenti óz eńbekaqysyn qysqartty
Ekvador prezıdenti Rafael Korrea memlekettiń birinshi tulǵalarynyń eńbekaqylary mólsherin shektep tastaý týraly jarlyqqa qol qoıdy. Bul sharanyń vıse-prezıdentter men mınıstrlerdiń de eńbekaqylaryna qatysy bar.
Sózimizdi naqty ispen dáleldeıtin bolaıyq, dep atap kórsetken Korrea myrza. Bul shara memleket basshysy men bútindeı alǵanda atqarýshy bılikti ustaýǵa ketetin shyǵyndardy qysqartýǵa baǵyttalyp otyr. Korrea bılikke kelgen 2007 jyly memleket basshysynyń eńbekaqysy aıyna 8 myń dollardy quraıtyn, biraq ol ony eki ese qysqartyp, eń tómengi eńbekaqymen baılanystyrý jóninde sheshim qabyldaǵan edi.
Internet materıaldary negizinde ázirlendi.
