Memorandýmǵa osy kúnderi Vena qalasynda ótip jatqan BUU-nyń Ǵarysh keńistigin beıbit maqsattarda paıdalaný jónindegi komıtetiniń (COPUOS) 62-shi sessııasy alańynda qol qoıyldy. Bul sessııaǵa qazaqstandyq delegasııany Qazaqstan Respýblıkasynyń Sıfrlyq damý, qorǵanys jáne aeroǵarysh ónerkásibi vıse-mınıstri Marat Nurǵojın bastap bardy.
Atalǵan is-shara aıasynda vıse-mınıstr ǵaryshty beıbit ıgerý salasyndaǵy Qazaqstannyń qyzmeti týraly baıandama jasady, atap aıtqanda ǵylymı-tehnologııalyq maqsattaǵy ǵarysh júıesi týraly aıtty.
Sonymen qatar, Marat Nurǵojın BUU-nyń Ǵarysh keńistigi máseleleri jónindegi basqarmasynyń dırektory Sımonetta dı Pıppomen kezdesti. Taraptar yntymaqtastyqtyń ózekti máselelerin talqylady, al kelissózder qorytyndysy boıynsha ózara túsinistik týraly Memorandýmǵa qol qoıdy.
"Bul Memorandým Qazaqstan Respýblıkasynyń Sıfrlyq damý, qorǵanys jáne aeroǵarysh ónerkásibi mınıstrligi men BUU arasyndaǵy ǵarysh qyzmeti salasyndaǵy yntymaqtastyqty damytý úshin jaqsy negiz bolady", - dep atap ótti Marat Nurǵojın.
Qujat tabıǵı apattarǵa qarsy kúres úshin ǵaryshtyq aqparatty paıdalaný salasyndaǵy odan ári yntymaqtastyqty bildiredi. Turaqty damý maqsattaryna qol jetkizý úshin ǵarysh sektorynda ınnovasııalardy engizý, ǵalymdardyń, stýdentter men basqa da mamandardyń biliktiligin arttyrý, sondaı-aq olardyń birlesken ǵylymı-zertteý is-sharalary men jobalarǵa qatysýyna yqpal etýge járdemdesýdi kúsheıtý máselesi sheshildi.
Sonymen qatar, qazaqstandyq delegasııa birqatar ekijaqty kezdesýler ótkizdi, atap aıtqanda, BAÁ Ǵarysh agenttiginiń bas dırektory, Iordan Koroldiginiń Geografııalyq ortalyǵynyń bas dırektory, Azııa-Tynyq muhıty Ǵarysh yntymaqtastyǵy uıymynyń Bas hatshysy, Perý Ǵarysh agenttiginiń basshysy jáne CONIDA /Perý/ kompanııasynyń dırektory, budan basqa, JAXA japondyq ǵarysh agenttiginiń ókilderimen jumys kezdesýi ótti.
Sondaı-aq, Vıse-mınıstr Komıtet sessııasyna qatysýshylar men ǵarysh agenttikteriniń basshylaryn 2019 jyly qazan aıynda Nur-Sultan qalasynda ótetin "Qazaqstandaǵy ǵarysh kúnderi" 7-shi halyqaralyq forýmyna qatysýǵa shaqyrdy.
