«Balam 15 jasynda maǵan jurtqa kún kórsetpegen tonaýshyny ustaýǵa kómektesken edi. Jasóspirim ulymnyń eshnárseden qoryqpaı, qaısar sheshim qabyldaǵanyna tańqalyp edim» deıdi ákesi polısııa ardageri Baýyrjan Dosymhanov. Medet joǵary oqý ornyn bitirgennen keıin óziniń týǵan óńirinde qyzmetin bastaıdy. Taran aýdandyq ishki ister bóliminde qylmystyq bólimsheni basqardy. Nebári 28 jasynda shekten shyqqan talaı buzaqyny tezge saldy, urylardy ustady. 2009 jyly sáýir aıynda Medet jylqy urlaǵan suǵanaqtardyń izin kesip, kórshi aýdanǵa barady. Urynyń aýlasyna kire bergende onyń aǵasy jáne sybaılasy úıden qarýmen júgirip shyǵady da, polıseılerdi kózdep shúrippeni basyp salady. Janyndaǵy dostaryn denesimen oqtan qalqalaǵan Medet aýyr jaraqat alady, kúre tamyryn oq úzip jiergen ony dárigerler ajaldan aman alyp qala almaıdy. Medetti jerlesteri umytpaıdy, ony eske alý úshin jyl saıyn sport, taǵy basqa da sharalar ótip turady. Bul joly aýyldaǵy oblystyq deńgeıde ótken týrnırge 6 komanda qatysty. Dástúrli sharany oblystyq Polısııa departamenti bastyǵynyń orynbasary Ardaq Yntyqbaev ashty. Sóz alǵan «Dınamo» deneshynyqtyrý-sport qoǵamy bastyǵynyń orynbasary Vıktor Chernıavskıı Jastar jyly jas urpaqty patrıottyq sezimge tárbıeleıtin mundaı sharalardyń ótýi óte durys, Medet sekildi batyrlardy jastar bilýi, umytpaýy, ulyqtaı berýi tıis ekenin aıtty.
Týrnırde birinshi oryndy Oblystyq polısııa departamentiniń komandasy, 2-shi oryndy rýdnyılyq polıseıler, 3-shi oryndy Taran aýdany polısııa bóliminiń komandasy jeńip aldy.
Qostanaı oblysy
Taran aýdany
