Sharaına
Seısenbi, 21 mamyr 2013 1:19
Tornado salǵan oıran
AQSh-tyń Aıova, Kanzas jáne Oklahoma shtattary aýmaǵynda jıyrmaǵa tarta tornado bolyp, júzdegen turǵyn úıler men elektr taratý jelilerine nuqsan keltirdi.
Seısenbi, 21 mamyr 2013 1:19
Tornado salǵan oıran
AQSh-tyń Aıova, Kanzas jáne Oklahoma shtattary aýmaǵynda jıyrmaǵa tarta tornado bolyp, júzdegen turǵyn úıler men elektr taratý jelilerine nuqsan keltirdi.
Buqaralyq aqparat quraldary bir adamnyń – Oklahoma shtatynyń 79 jasar turǵynynyń qaza tapqany týraly habarlaǵan. Onyń syrtynda kem degende alty adam túrli dene jaraqattaryn alǵan kórinedi. On myńnan astam adamnyń elektr jaryǵynsyz qalǵany belgili bolyp otyr. Kanzas shtatynyń Vıchıta áýejaıynan evakýasııa jasaldy. Tornado ǵımarattardyń shatyrlaryn julyp áketip, jol boıyndaǵy júk kólikterin aýdaryp tastaǵan. Meteorologtardyń málimetinshe, dúısenbi, seısenbi kúnderi osy atalǵan shtattarǵa tabıǵat apatynyń qaıta aınalyp soǵýy múmkin.
Úkimet áskerleriniń tegeýrindi shabýyldary
Bashar Asadtyń áskeri Sırııanyń batysynda Homs ónerkásip ortalyǵynan otyz shaqyrym jerdegi Kýseır qalasyn basyp aldy. Bul jer ereýilshiler úshin mańyzdy strategııalyq meken bolyp tabylatyn.
Qalada keskilesken urystar júrýde. Memlekettik BAQ-tar 70 terrorshynyń ajal qushqanyn jáne qala ortalyǵyndaǵy sheshýshi ǵımarattardyń úkimet áskeri qolyna kóshkenin habarlady. Áskerıler qalaǵa jeksenbi kúni tańerteń kirip, kúni boıyna ońtústik jáne batys aýdandardy azat etken. Soltústik kvartaldarda áli de urystar júrýde. Ereýilshiler pozısııalaryn shabýyldar aldynda eger óz erikterimen berilmese, shabýyl bastalatyny týraly áýeden eskertý paraqshalary tastalǵan kórinedi.
Týnıstegi salafıtter ereýili
Týnıste musylman-salafıtterdiń polısııamen qaqtyǵysy kezinde bir adam qaza taýyp, onnan astam adam dene jaraqattaryn alǵan.
«Ansar ash-Sharıa» radıkaldy tobynyń belsendileri jeksenbi kúni ishki ister mınıstrliginiń qarsylyq bildirgenine qaramastan óz sezin ótkizbek bolǵan. Onyń aıaǵy tártipsizdikterge jáne polısııamen qaqtyǵysqa aparyp soqtyrǵan. Polısııa jınalǵandardy qýyp taratý úshin kóz jasaýratatyn gaz qoldanǵan. 2011 jyly prezıdent Ben-Alı oryntaǵynan qýylǵannan keıin Týnıste salafıtter boı kórsetýleri jıileı túskenin aıta ketý qajet.
Shpıondyq jasaǵandary úshin darǵa asyldy
Iranda AQSh pen Izraıldiń paıdasyna shpıondyq jasaǵany úshin kináli dep tanylǵan eki adam darǵa asý arqyly ólim jazasyna kesildi. Bul týraly Iran BAQ-taryna silteme jasaı otyryp, Reıter agenttigi habarlaǵan.
Onda ızraıldik «Mossadqa» qupııa aqparat bergeni úshin kináli dep tanylǵan Mohammad Heıdarıge jáne AQSh-tyń ortalyq barlaý basqarmasyna aqparat bergeni úshin aıypty bolyp sanalǵan Kýrýsh Ahmadıge qatysty úkimniń ústimizdegi jyldyń 19 mamyry kúni tań aldynda oryndalǵany týraly aıtylǵan. Úkimdi Irannyń revolıýsııalyq soty júzege asyrǵan. M.Heıdarı men K.Ahmadıdiń qalaı tutqyndalǵany jáne sot prosesiniń qalaı ótkendigi belgisiz kúıinde qalyp otyr.
Turǵyn úıde gaz jaryldy
Ulybrıtanııada turǵyn úılerdiń birinde turmystyq gazdyń jarylýy saldarynan bes adam zardap shekken. ITAR-TASS-tyń Sky News agenttigine silteme jasaı otyryp habarlaýynsha, birneshe adamnyń úıindiler astynda qalǵan bolýy múmkin.
Oqıǵa jeksenbi kúni aǵylshynnyń Nıýark qalasynda oryn alǵan. Kózben kórgenderdiń aıtýlaryna qaraǵanda, jarylystan soń birneshe sekýnd ótisimen úıdiń qabyrǵalary qulap túsken kórinedi. Qazir jarylys bolǵan jerde qutqarýshylar men órt sóndirýshiler úıindilerdi arshý jumystarymen aınalysýda.
Saıasatker ajalyna kim kináli?
«Pákstan Tehrık-e-Insaf» partııasynyń ókili Zahra Hýsseın Karachıdegi óz úıinde ajal qushqan. Pákstandyq saıasatker jáne burynǵy krıket juldyzy Imran Han óz partııasy basshylarynyń biriniń ólimine qatysty básekelesterin kinálap otyr.
Dálirek aıtqanda, partııa lıderi Imran Han Zahr Shahıd Hýsseınniń ólimi úshin ózimen básekeles «Mýttahıda Komı» qozǵalysy kináli dep málimdegen. Polısııanyń málimeti boıynsha, Hýsseınniń Karachıdegi úıinde oryn alǵan ólimine kem degende qarýlanǵan eki belgisiz adam kináli. Saıasatkerdiń basyna eki ret oq atylǵan, sonyń saldarynan ol aýrýhanaǵa bara jatqan jolda qaza tapqan kórinedi. Onyń partııalastary bul oqıǵany terrorlyq akt dep atap otyr.
Egıpet óz soldattaryn qutqarmaq nıette
Armııaǵa jáne Egıpet IIM janyndaǵy ortalyq qaýipsizdik basqarmasyna jańadan alynǵan jeti soldatty 16 mamyr kúni bireýler qolǵa túsirgen.
Soldattardy urlaýshylar túrmelerdegi ólim jazasyna kesilgen óz adamdaryn bosatýdy talap etýde. Egıpettiń kúshtik qurylymdary bolsa turaqty armııanyń qolǵa túsken soldattaryn bosatý maqsatynda arnaıy operasııaǵa daıyndalýda. «Ál-Iаým as-Sabıa» portalynyń jazýyna qaraǵanda, arnaıy maqsattaǵy bólimder Sınaı túbeginde aıtarlyqtaı kúshterin jumyldyrýda. Keıbir málimetterge qaraǵanda, qylmyskerler qolǵa túsken soldattardy kórshiles Gaza sektoryna asyryp jibermek nıette kórinedi.
Lı Kesıannyń Úndistanǵa sapary
Qytaıdyń memlekettik keńesiniń premeri Lı Kesıan úsh kúndik resmı saparmen Úndistanǵa keldi. Nıý-Delı áýejaıynda qytaılyq delegasııany Úndistan syrtqy ister mınıstri men ózge de joǵary laýazymdy sheneýnikter qarsy aldy.
Lı Kesıannyń áýejaıda taratylǵan jazbasha málimdemesinde Qytaı men Úndistannyń iri damýshy memleketter ekendigi, eki el arasyndaǵy qarym-qatynastardyń birqalypty damyp kele jatqandyǵy, olardyń eki eldiń de túbegeıli múddelerine jaýap beretindigi, sondaı-aq, Azııanyń jáne bútindeı alǵanda búkil álemde beıbitshilik pen órkendeýdi qamtamasyz etýge qosylǵan úles ekendigi atap kórsetilgen. Aıta ketý qajet, Qytaı úkimeti Úndistandy mańyzdy áriptes dep tanıdy.
Internet materıaldary negizinde ázirlendi.
