Mysyr tarıhyndaǵy besinshi, demokratııalyq saılaý arqyly bılikke kelgen alǵashqy prezıdent atanǵan Muhammed Mýrsı 1951 jyly dúnıege kelgen. Jas kúninde «Musylman baýyrlar» qozǵalysyna qatysqan qaıratker 2000-2005 jyldary Mysyr parlamentiniń depýtaty boldy. 2011 jyly Hosnı Mýbarakqa qarsy ereýilderge belsene qatysqan saıasatker 2012 jyly eldegi prezıdent saılaýynyń ekinshi týrynda 51,73 paıyz daýys jınap, el prezıdenti bolyp saılanǵan bolatyn. Alaıda, 2013 jyldyń 3 shildesinde Mysyr qarýly kúshteri tóńkeris jasap, ony bılikten taıdyrdy. Ornyna tóńkerisshilerdiń jetekshisi Abdýlfattah ál Sısı bılikke kelgen edi. Bılikti basyp alǵan áskerıler Mýrsıge birqatar aıyp taqty. Atap aıtqanda, oǵan tyńshylyq jasady, «Hamas» jáne «Hezbolla» tárizdi radıkal toptarmen baılanys jasady, avtorıtarlyq júıe ornatpaq boldy degen aıyptar taǵyldy. Sonymen qatar, 2015 jyly oǵan ereýilshilerdi tutqyndap, azaptady degen aıyp ta taǵylǵan edi. Sóıtip, 20 jyl bas bostandyǵynan aıyrý úkimi shyqqan bolatyn. Sonymen qatar, ózge de aıyptar negizinde oǵan 46 jyl abaqtyda otyrý jazasy taǵaıyndalǵany jaıly da derekter taraǵan-dy. Biraq, sot prosesine jýrnalıster qatystyrylǵan emes.
BBC-diń habarlaýyna qaraǵanda ol ınfarktan kóz jumǵan bolýy múmkin. Eks-prezıdenttiń advokaty Abdýlmýmın Abdýlmaksýd sot zalynda kóz jumaǵan Mýrısdiń denesin áskerıler alyp ketkenin aıtypty. Biraq, advokat saıasatkerdiń denesin bılik ókilderi qaıda áketkenin bilmeıtin bolyp shyqty. Mýrsıdiń týystarynyń ótinishterin de sot qabyl almapty. Sóıtip, ony áýlettiń zıratyna jerleý de múmkin bolmaı tursa kerek.
Mysyr eks-prezıdentiniń qazasyna oraı álemdik mass-medıa túrli aqparattar taratyp jatyr. Ásirese, bul qazaǵa baılanysty Túrkııa qaıratkerleri túrli málimdemeler jasap úlgerdi. Túrkııa prezıdenti Rejep Taıyp Erdoǵan ony «baýyrym» dep atasa, Syrtqy ister mınıstri Mevlýt Chavýshoǵlý «Tóńkerisshiler ony bılikten alastatqanymen, ol jaıly estelikter kóńilimizden óshpeıdi»,-dedi. Sonymen qatar, Túrkııa din isteri mınıstrligi 81 eldimekende Mýrsıge arnap ǵaıyp janaza namazy oqylatyny týraly málimdeme jasapty.
