Atalǵan eki pakettiń aıyrmashylyǵy qandaı? Kepildendirilgen tegin medısınalyq kómek paketi mınımaldy standarttardan turady. Mysaly: shuǵyl kómekke zárý azamattarǵa medısınalyq kómek kórsetý, epıdemııanyń jappaı taralýyna jol bermeý, memlekettiń aralasýyn qajet etetin qıyn jaǵdaılarǵa dýshar bolǵan naýqastarǵa kómek kórsetý t.b. Saqtandyrý paketi pasıentterdiń ómir sapasyn jaqsartyp, ult bolashaǵynyń negizin qalaýǵa baǵyttalatyn ózge de kómek túrlerin qamtıdy.
Habarlamaǵa súıensek, TMKKK paketiniń jańa nusqasyn ázirlegen kezde tizimge engen barlyq qyzmet túrlerin jan-jaqty saraptalyp, eksheldi. Paketterdiń jańa úlgisin daıyndaý barysynda mınıstrlik bir jarym jyl boıy medısına salasy ókilderimen birlesip jumys istedi. Atap aıtqanda, qyzmetterdi satyp alý, aqy tóleý, monıtorıng prosesin júzege asyrý tetikteri keńinen talqylandy. Bul baǵyttaǵy jumystar aldaǵy ýaqytta da jalǵasyn tabady. Degenmen MÁMS júıesin engizýge daıyndyǵymyz joǵary deýge bolady. Jańa paketter bıyl kúzde elimizdegi aımaqtardyń birinde nobaıly rejımde iske qosylmaq. Jańa júıe 2020 jyldan bastap Qazaqstannyń barlyq aımaqtarynda iske qosylady.
«Jalpy alǵanda, keler jylǵa arnalǵan bıýdjet jobasynda kepildendirilgen tegin medısınalyq kómek pen saqtandyrý paketteri negizinde kórsetiletin kómekke 1 620 mlrd teńgeden astam qarjy qarastyrylǵan», - dedi «Áleýmettik medısınalyq saqtandyrý qory» KEAQ basqarma tóraǵasy Aıbatyr Jumaǵulov.
Elimizdiń barlyq azamattary paıdalana alatyn kepildendirilgen tegin medısınalyq kómek paketine jedel járdem men sanıtarlyq avıasııa, shuǵyl stasıonarlyq kómek, pallıatıvtik kómek engen. Sonymen qatar, áleýmettik mańyzy bar syrqattar men sozylmaly aýrýlardyń negizgi túrlerimen aýyratyn turǵyndar osy paket sheńberinde konsýltatıvtik-dıagnostıkalyq kómekpen, josparly stasıonarlyq jáne stasıonardy almastyratyn kómekpen qamtamasyz etiledi. Ambýlatorııa deńgeıinde dári-dármekpen qamtý, týberkýlezge shaldyqqandardy ońaltý qyzmeti de osy paketke kiredi.
MÁMS paketi: konsýltatıvtik-dıagnostıkalyq kómek, sonyń ishinde baǵasy qymbat bolyp keletin zerthanalyq qyzmet túrlerin, TMKKK enbegen syrqattardy dári-dármekpen qamtamasyz etý, TMKKK paketine jatpaıtyn jaǵdaılarda josparly stasıonarlyq jáne stasınardy almastyratyn kómekpen qamtý, medısınalyq ońaltý jáne pasıent densaýlyǵyn qalpyna keltirýge baǵyttalǵan em-dom túrlerin qamtymaq.
Esterińizge sala ketsek, TMKKK sheńberinde halyqqa kórsetiletin medısınalyq qyzmetterdi bıýdjet qarjysy esebinen, MÁMS paketine enetin qyzmetter – Qordyń aktıvteri esebinen satyp alynady. Qazirgi tańda Medısınalyq saqtandyrý qoryna Qazaqstan boıynsha 176,7 mlrd teńge kóleminde jarna aýdaryldy. Jınaqtalǵan qarjy Ulttyq bankte saqtalady jáne 2020 jyldan bastap MÁMS sheńberinde kórsetilgen qyzmetter aqysyn tóleýge jumsalady.
