A. Aımaǵambetovtyń aıtýynsha, 2019 jyly test tapsyrmalarynyń bazasy jańartyldy. Suraqtar fýnksıonaldyq saýattylyqqa, logıkalyq oılaý deńgeıin anyqtaýǵa, bazalyq quzyrettilikter men túsinikke baǵdarlanǵan.
«Biz úshin mańyzdylardyń biri – suraqtardyń mazmunyn jańartý. Suraqtar qandaı da bir jattandy aqparatty qaıtalaýǵa, este saqtalǵan belgili bir faktilerdi eske túsirýge baǵyttalmaýy tıis. Osy test arqyly onyń saýattylyǵyn, balanyń baǵdarlanýyn, mektepte alǵan bilimin qanshalyqty paıdalana alatynyn túsiný kerek. Test suraqtarynyń bazasy, basty nazar jáne mazmuny ózgertiledi», — dedi bilim jáne ǵylym mınıstri.
A. Aımaǵambetovtyń aıtýynsha, suraqtardy qurastyrý úshin eń tájirıbeli ári aldyńǵy qatardaǵy pedagogtar tartylady. Ázirleýshiler men sarapshylar oblystyq, qalalyq bilim berý basqarmalary,tilderdi damytý basqarmalary, tilderge oqytýdyń óńirlik ortalyqtary, biliktilikti arttyrý ınstıtýttary, oqý-ádistemeli birlestikter, kolledjder, JOO-lar usynǵan bilim berý uıymdarynyń qyzmetkerlerinen, muǵalimder men oqytýshylardan iriktep alynady.
Sonymen qatar, bilim jáne ǵylym mınıstri testilerde maǵynasy túsiniksiz nemese túlekterdiń pikirinshe qate jaýaptar bolsa, apellıasııa rásimine júginý kerek ekenin atap ótti.
Apellıasııalyq komıssıı árbir UBT ótetin pýnktte qurylǵan, sonymen qatar Respýblıkalyq apellıasııalyq komıssııa quryldy. Komıssııa quramyna tájirıbeli mamandar engizilgen, olar shaǵymdy qarastyrýdyń obektıvtiligin qadaǵalaıdy.
«Ondaı jaǵdaılar bar, tipti, ǵylymda belgili bir kúnder, oqıǵalar boıynsha birneshe málimet bar. Sondyqtan keıde túlekter apellıasııaǵa kelip, tıisti derek kózin kórsetip, dáleldep jatady. Komıssııa qarap rastaǵan suraqtar sany birneshe ese tómendegenin atap ótkim keledi», — dedi A. Aımaǵambetov.
2019 jyly UBT-ǵa qatysýǵa ótinish bildirgen mektep túlekteriniń jalpy sany 96 380 ekenin aıta ketken jón, onyń ishinde 73 389 túlek testileýdi qazaq tilinde, 22 823-i orys tilinde tapsyratyn bolady, bul 75:25 ara qatynasyn quraıdy. UBT 20 maýsym men 5 shilde aralyǵynda 9 aǵymmen 169 UBT ótkizý pýnkterinde ótkiziledi. Testileý 5 pán: bilim berý baǵdarlamalarynyń tańdalǵan tobyna sáıkes 3 mindetti jáne 2 beıindi pán boıynsha júrgiziledi. Barlyǵy 120 test tapsyrmasy bolady. Eń joǵarǵy ball — 140.
