Jalpy, HHI ǵasyrda, jahandyq qaýymdastyq damýdyń jańa belesterin baǵyndyryp jatqan kezeńde damyǵan elderdiń barlyǵy memlekettiń basty baılyǵy, alǵa súıreıtin lokomotıvi adam ekenin, eldiń azamattary ekenin jaqsy túsindi. Sol úshin jalpy halyqtyń deńgeıin kóterýge, adamı kapıtaldyń sapasyn arttyrýǵa tyrysyp jatyr. Osy oraıda, Qasym-Jomart Toqaevtyń sózinde bıliktiń basty mıssııasy halyqtyń jaǵdaıyn jaqsartý ekeni aıqyn aıtyldy. Iаǵnı, áleýmettik jaǵdaıdy kóterý, tabysty arttyrý, baspana salý, áleýmettik ádilettilik ornatý, bilim berý men densaýlyq saqtaý salasyn damytý, eń aıaǵy aýyz sýmen qamtý syndy máselelerdiń kez kelgeni belgili bir dárejede azamattardyń jalpy deńgeıin kóterýge áser etetini anyq.
Búgingi tańda Qazaqstandaǵy 14-29 jas aralyǵyndaǵy jastardyń sany 4 mıllıon shamasynda. Olardyń saýattylyq deńgeıi 99,8 paıyzǵa teń. Men ózim de eki ul ósirip otyrǵan anamyn. Jas urpaq árbir otbasynyń ǵana bolashaǵy emes, eldiń de bolashaǵy dep sanaımyn. Balalarymyzdyń jan-jaqty jetilgen azamat bolǵanyn qalaımyn. Sol sebepti Prezıdenttiń sózinde osy jastar máselesi erekshe atalǵanyna kóńilimiz toldy.
Árbir jas azamat arman-maqsatyna óz elinde júrip qol jetkizip, keń-baıtaq eliniń damýyna úlesin qosýǵa tıis. Bul baǵytta elimizde birshama jumystar atqarylyp keldi, aldaǵy ýaqytta ol jalǵasa beretinin de Memleket basshysy aıtty. Máselen, bıylǵy jyl Jastar jyly dep jarııalandy. «Jastar – el tiregi» jobasyn, «Jas kásipker» bıznes bastamasyn damytý baǵdarlamasy júzege asyrylýda. Endi jumysqa ornalastyrý baǵdarlamalary daıyndalmaq, «Prezıdenttiń kadrlyq rezervi» jasaqtalmaq. Jastardy qoldaý – eldi damytýǵa jumsalǵan eń basty ınvestısııa, eń tıimdi ınvestısııa. Kez kelgen eldiń damýyna jastar saıasatynyń durys aıqyndalýy erekshe yqpal etedi. Joǵaryda aıtylǵan sharalar elimizdiń turaqty damýyna úlken úlesin tıgizetini sózsiz.
Dınara AQYNBEKOVA,
ekonomıka ǵylymdarynyń kandıdaty
