Sońǵy 15 jylda bıyl alǵash ret Almatyǵa keletin sheteldik týrısterdiń sany 45paıyzǵa ósken. «Statıstıka komıtetiniń deregi boıynsha, bıyl birinshi toqsannyń ózinde Almaty qalasyna aǵylǵan sheteldik týrısterdiń sany 91 myńnan asqan» - dep habarlaıdy Almaty qalasynyń baspasóz qyzmeti.
Almaty qalalyq Týrızm basqarmasynyń basshysy Maqsat Qıqymov megapolıske keletin sheteldik týrısterdiń sany arta túskenin málimdedi. Tipti Azıada men Ýnıversıada kezinde de mundaı dárejege jetpegen Almatyǵa kelýshi sheteldik týrısterdiń sany búginde 25 paıyzǵa artyp, 271 myń saıahatshyǵa jetken. Onyń 180 myńy – ishki týrıster. Taǵy bir aıta keterligi, bir jyldyń ishinde qaladaǵy qonaqúıler men hostelder sany da burynǵydan 40 paıyzǵa ósken.
Saıahatshylardyń artýy qalada joǵary sanattaǵy qonaqúıler men meıramhanalardyń kóbeıýine de yqpal etip otyr. Sheteldik meımandardyń Almatyǵa qyzyǵýshylyǵy artqanyn baıqaǵan ınvestorlar bıyl shaharda halyqaralyq talapqa saı 3 qonaqúı ashpaqshy.
Almatyǵa keletin týrısterdiń sany jyl sanap artyp keledi. Máselen, ótken jyly shaharǵa jarty 1 mıllıonǵa jýyq qonaq kelse, olardyń 40 paıyzdan astamy sheteldikter.
Saıahatshylardyń kóshin irgedegi Reseı turǵyndary bastasa, ármen qaraı Qytaı, Iran jáne Úndistan eliniń azamattary jalǵaıdy. Bıyl týrızm salasyn damytýǵa sandyq tehnologııalardy kóptep qoldaný josparlanyp otyr. Sheteldik meımandar kóp baratyn qaladaǵy mańyzdy 33 ǵımaratqa jýyqta QR-kod ornatylady. Osylaısha týrıster gıdtiń kómeginsiz-aq nysan týraly aqparatty 4 tildegi aýdıomen tyńdaı alady.
ALMATY
