Is-sharaǵa Mańǵystaý oblystyq sotynyń sýdıasy Gúlajar Baqytjanova jáne aýdandyq sottardyń sýdıalary, Mańǵystaý oblysynyń Kásipodaqtar ortalyǵynyń tóraǵasy Kıikbaı Jaýlın, eńbek ınspeksııasy basqarmasy, «Atameken» kásipkerler palatasy óńirlik fılıaly, mekeme ókilderi, medıatorlar qatysty.
-Dóńgelek ústel barysynda spıkerler eńbek daýlaryn sheshý barysyndaǵy sot tájirıbesi, kelisý komıssııasynda ótinishti qaraý kezindegi ózekti máseleler, korporatıvtik daýlardy qaraý barysyndaǵy sot praktıkasy, eńbek qyzmetine baılanysty jazataıym oqıǵalardy tergep-tekserý kezindegi týyndaıtyn suraqtar taqyrybynda baıandamalar oqydy. Sondaı-aq, is-sharada orta jáne shaǵyn kásipkerlerge qatysty eńbek daýlary, jumyskerdi basqa jumysqa aýystyrý, tártiptik jazany qoldaný, eńbek daýlary boıynsha tatýlasý prosedýralary týraly qundy aqparattar talqyǵa saldy, deıdi Mańǵystaý oblystyq sotynyń baspasóz mamany Nurshat О́teýlıeva.
Dóńgelek ústelde sóz alǵan Aqtaý qalasynyń №2 sotynyń sýdıasy Kanzıba Rysqalıeva Qazaqstan Respýblıkasy Azamattyq prosestik kodeksindegi tatýlastyrý rásimderine toqtalyp, óńir boıynsha talap qoıýshylar kóp jaǵdaıda burynǵy jumysyna qaıta ornalastyrý, bos júrgen kúnderine eńbekaqy óndirý, jumys berýshiniń eńbek etý kezinde keltirgen moraldyq jáne materıaldyq zııanyna ótemaqy óndirý týraly talaptarmen júginetindigin atap ótti.
Odan ári medıator Mýsa Nurjanov óńirdegi Kásipodaqtar úıinde tatýlastyrý ortalyǵy men medıasııa kabıneti jumys jasaıtyndyǵyna toqtalyp, is júzinde eńbek daýlary taraptar tarapynan kelissózder arqyly, eńbek daýyn sheshý komıtetine, sotqa júginý arqyly jáne t.b. joldarmen sheshilýi múmkin ekendigin atap ótti.
Sondaı-aq, ol eńbek daýlaryna qatysty medıasııa rásimi ujymdaǵy psıhologııalyq shıelenisti, qyzmetker men jumys berýshiniń arasyndaǵy janjal men qaqtyǵys kúsheıýin azaıtatynyn, kompanııanyń bedelin saqtaýǵa múmkindik beretinin, ujym jáne kásiporynnyń daýlaryn retteý rásimderiniń shyǵyndaryn azaıtatyndyǵyna toqtaldy.
Dóńgelek ústel sońynda qatysýshylar usynystaryn ortaǵa salyp, oı-pikirlerimen bólisti.
