Eskertkishtiń ashylý rásimine Qaraǵandy oblystyq polısııa departamenti basshysynyń birinshi orynbasary, polısııa polkovnıgi Qurmanǵalı Ismaǵulov, Shet aýdanynyń ákimi Marat Jandáýletov, Shet aýdandyq polısııa bóliminiń basshylyǵy men jeke quramy jáne turǵyndar qatysty.
Polısııa basshysy men aýdan ákimi eskertkishti ashqannan keıin, sharaǵa qatysýshylar aldynda sóz sóıledi.
– Qyzmettik mindetterin oryndaý barysynda qaza bolǵandardy eske alyp, olardyń rýhyna taǵzym etý – bizdiń qasıetti boryshymyz! Bul – keıingi urpaq úshin úlgi bolarlyq ıgi is, – dep atap ótti Q.Ismaǵulov.
Budan keıin eskertkishke aza gúlderi qoıylyp, qaza bolǵandardy bir mınýttyq únsizdikpen eske alý rásimi oryndaldy. Qarýdan dúrkindete oq atyldy.
Sonan soń, polısııa polkovnıgi Q.Ismaǵulov mereke qurmetine oraı Shet aýdandyq polısııa bóliminiń bastyǵyna qyzmettik «Nıva» avtokólikteriniń kiltterin tabys etti.
Aýdandyq mádenı-oıyn-saýyq ortalyǵynda jalǵasqan shara barysynda jergilikti polısııa bólimshesiniń bir top qyzmetkerleri Ishki ister mınıstriniń, oblystyq polısııa departamenti basshysynyń jáne aýdan ákiminiń qurmet gramotalarymen marapattaldy. Sonymen qatar, birqatar tártip saqshysyna kezekti shen berildi.
Shara sońynda jergilikti ónerpazdardyń kúshimen merekelik konsert qoıyldy.
Qaraǵandy oblysy
