– Elimizge qaıǵy ákelgen osy kúnderde jeke ózimniń jáne Senat depýtattarynyń atynan qaza tapqan jáne zardap shekkenderdiń otbasylaryna qaıǵyryp kóńil aıtamyn. Sizder dýshar bolǵan qaıǵyǵa ortaqtasyp, birge qaıǵyramyz, biz Sizdermen birgemiz, – dedi Senat Tóraǵasy Darıǵa Nazarbaeva.
Májilis depýtattary da Arys turǵyndaryna kómektesý úshin bir kúndik jalaqylaryn aýdaratyn boldy.
Arys halqyna kómek qolyn sozǵandardyń qatarynda Premer-Mınıstr Keńsesiniń qyzmetkerleri de bar.
– Arys qalasy turǵyndarynyń jaǵdaıyna búkil halyq alańdaýda, búkil el jumylyp atsalysýda. Osy rette Nur Otan partııasynyń Arys turǵyndaryna kómek qolyn sozý maqsatynda qarajat jınaý bastamasyn qoldaýǵa shaqyramyn, – dedi Úkimet basshysy A.Mamın.
Eske salaıyq, Prezıdent Qasym-Jomart Toqaevtyń tapsyrmasy boıynsha Úkimettik komıssııa turǵyn úılerge, áleýmettik jáne ınfraqurylymdyq nysandarǵa, qalanyń tirshiligin qamtamasyz etetin nysandarǵa tıgizilgen zardapty baǵalaıtyn bolady.
Mádenıet jáne sport mınıstrligi de T.Júrgenov atyndaǵy Qazaq ulttyq óner akademııasy jáne Nur-Sultan qalasyndaǵy Ulttyq akademııalyq kitaphananyń janynan shtabtar qurdy. 27 maýsym kúni Arys qalasyna «Arys, biz birgemiz!» gýmanıtarlyq kómek kerýeni jóneltiledi.
Sondaı-aq tanymal mádenıet jáne sport qaıratkerleri halyqtyń rýhyn kóterip evakýasııalanǵan turǵyndar men áskerılerdi qoldaý maqsatynda Arys qalasyna attanatyn bolady.
Eńbek jáne halyqty áleýmettik qorǵaý mınıstrliginiń, sondaı-aq vedomstvolyq baǵynyshty uıymdary men óńirlik departamentteriniń qyzmetkerleri Túrkistan oblysy Arys qalasynyń turǵyndaryna kómektesý úshin bir kúndik jalaqylaryn aýdarady.
Densaýlyq saqtaý mınıstrliginiń ortalyq apparat qyzmetkerleri men vedomstvoǵa qarasty uıymdar, elimizdegi dárigerler de qaıyrymdylyq sharaǵa atsalysyp, olarǵa qoldaý retinde bir kúndik eńbekaqysyn aýdarmaq.
– Densaýlyq saqtaý mınıstri Eljan Birtanovtyń aıtýynsha, mınıstrlik pen vedomstvoǵa qarasty uıymdardyń basshylary jaraqat alǵan azamattarǵa medısınalyq kómek kórsetý úshin barlyq jaǵdaıdy jasaıdy.
Qazaqstan halqy Assambleıasy da qaıyrymdylyq aksııasynan qalys qalǵan joq. Nur-Sultan qalasynyń Dostyq úıinde elorda etnomádenı birlestikteriniń ókilderi bas qosyp, qaıyrymdylyqqa baǵyttalǵan isterdi júıeli atqaryp shyǵýǵa ýaǵdalasyp, qaıyrymdylyq kómegin uıymdastyratynyn málimdedi. Arys halqyna jóneltiletin zattar tizimi jasaldy. Elordalyq ózbek etnomádenı ortalyǵy tóraǵasynyń orynbasary Hasan Sharıpov jeke qarjysy esebinen Arys qalasyna 22 tonna un jóneltipti. Assambleıanyń jer-jerdegi fılıaldary da qaıyrymdylyq iske atsalysýda.
Ulttyq operator «QazTransGaz» AQ kompanııalar tobynyń qyzmetkerleri alapat jarylystan zardap shekken turǵyndarǵa kómek retinde ózderiniń bir kúndik eńbek aqysyn aýdarý týraly sheshim qabyldady. Gaz mamandary jınaǵan kómek qarjy kólemi 120 mln teńgeden asady.
Túrkistan oblysynyń Arys qalasynda bolyp jatqan oqys oqıǵa UQK Shekara qyzmetiniń shekarashylaryn da beıtarap qaldyrmady. Osyǵan baılanysty Shekara qyzmetiniń búkil jeke quramy bir aýyzdan bir kúndik eńbekaqy kóleminde qarjylaı kómek berý týraly sheshim qabyldady.
Arystaǵy jaǵdaıǵa elimizdegi halyqaralyq uıymdar da kómek qolyn sozýda. Máselen, Halyqaralyq Túrki akademııasy keshe birkúndik jalaqylaryn arystyqtarǵa kómek qoryna aýdardy.
Eldiń eldigi synǵa túsken shaqta qol qýsyryp qarap otyrmaı, demeý bolýǵa asyqqan adamdardyń qatary kóp. Memlekettik organdar da, jekeleı azamattar da járdem berýge jumylyp atsalysýda. Syn saǵat týǵanda halqymyz eldiktiń eren úlgisin kórsetip jatyr desek artyq emes.
Túrkistan oblysy Arys qalasynda zardap shekkenderge kómek kórsetý úshin oblys ákimdigi janynan ashylǵan «Túrkistan» korporatıvtik áleýmettik damý qoryna habarlasýǵa bolady.
Anyqtama úshin «Túrkistan» korporatıvtik áleýmettik damý qory rekvızıtterin gazet oqyrmandarynyń nazaryna usynamyz:
Túrkistan oblysy
Túrkistan qalasy,
Qyzylorda tas joly, 34 A ǵımaraty,
Poshta ındeksi 161200
BSN (BIN) 100440016000
«ForteBank» AQ
Túrkistan qalasyndaǵy fılıaly
JSK (IIK) KZ7196528F0007014540
BSK (BIK) IRTYKZKA
Qaıyrymdylyq kómek retinde aýdarylǵan qarajat «Túrkistan» áleýmettik damý qorynyń korporatıvtik kartasyna da qabyldanady: 4042 4583 0000 0843 DAURENBEK KURBANIYAZOV
Qor dırektory: Qurbanııazov Dáýrenbek +77718933536
