Bul qoqys alańqaıy jaqyn mańdaǵy onnan astam kópqabatty úılerge qyzmet etedi. Turǵyndar endi qoqysty suryptaýǵa daǵdylana bastaıdy. Eýrokonteınerlermen birge munda metall, plastık, karton jáne shyny jınaıtyn bólek jáshikter de bolady.
«GorKomTrans» JShS-niń bas dırektory Marat Bımaǵambetov bul jobany iske asyrý jónindegi bastamany memlekettik-jekemenshik áriptestik aıasynda kótergenderin aıtady.
– Basty maqsat – qyzmet kórsetý sapasyn jaqsartý, qalany taza etý jáne adamdarǵa qoqysty bólek jınaý mádenıetin úıretý. Alańqaılardy óz qarajatymyzǵa ornalastyramyz. Shyǵyndar tarıfke enbeıdi. Bir eýrokonteıner 85 myń teńge turady. Bılik tarapy bul jobaǵa jer ýchaskesin bólý jáne qajetti ınjenerlik kommýnıkasııalardy tartyp berý sııaqty kómek sharalary arqyly qatysyp jatyr, – dedi ol.
Sondaı-aq, Marat Bımaǵambetov 2019-2020 jyldary qala boıynsha dál osyndaı 300 qoqys jınaý pýnktin salý josparlanǵanyn aıtty.
Jańa tásil boıynsha suryptalyp jınalǵan qoqystyń qaıda jóneltiletini de aldyn ala sheshilip qoıylǵan. Mysaly Qaraǵandydaǵy qoqys óńdeıtin zaýytta plastık shólmekterden sıntetıkalyq talshyqtardy óndirýge arnalǵan shıkizat alynady. Ol hollofaıber ázirleıtin reseılik zaýyttardyń birine jiberiledi. Karton men qaǵaz qus fabrıkalarynyń tapsyrystary boıynsha jumyrtqaǵa arnalǵan lotoktar shyǵaratyn jergilikti óndirýshige jetkiziledi. Shynydan jasalǵan zattardy Kókshetaýdaǵy qaıta óńdeý isimen aınalysatyn fırmanyń biri qabyldap alady. Sonymen qatar, plastık pen polıetılendi iske jaratatyn kompanııalar da qazirgi ýaqytta belgili bolǵan.
«GorKomTrans» fırmasy is-áreket aıasyn keńitip, aldaǵy ýaqytta kólik parkin jańartýdy da qolǵa almaqshy. Kompanııa eýrokonteınerlerge laıyqtalǵan jańa úlgidegi qoqys tasyǵysh mashınasyn synap kórmekshi. Eger tehnıka synaqtap sátti ótip, óziniń artyqshylyqtaryn kórsetip jatsa, onda kásiporyn olardy satyp alatyn bolady.
Qaraǵandy oblysy
