Atalǵan klýbtyń otyrysyna Qazaqstan halqy Assambleıasy Tóraǵasynyń orynbasary Janseıit Túımebaev, Parlament Májilisi Tóraǵasynyń orynbasary Vladımır Bojko, Parlament depýtattary, Aqparat jáne qoǵamdyq damý mınıstrliginiń jáne basqa memlekettik organdardyń ókilderi, QHA músheleri, respýblıkalyq jáne aımaqtyq BAQ bas redaktorlary, etnosaralyq qatynastar salasyndaǵy sarapshylar, ǵylymı jáne shyǵarmashylyq qaýym men blogerler qatysty.
Alqaly jıynnyń kún tártibinde Memleket basshysynyń «Sabaqtastyq. Ádildik. О́rleý» saılaýaldy baǵdarlamasyndaǵy tapsyrmalardyń oryndalý barysynda jýrnalıster qaýymy aldynda turǵan mindetter talqylandy. Sondaı-aq qoǵamnyń birligin nyǵaıtý jónindegi jumystar, sonyń ishinde Qazaqstan halqy Assambleıasynyń Túrkistan oblysy Arys qalasyndaǵy tótenshe jaǵdaıǵa baılanysty kórsetip jatqan kómegi jan-jaqty baıandaldy.
Aldymen sóz bastaǵan Janseıit Túımebaev jınalǵan qaýymdy 28 maýsym – Buqaralyq aqparat quraldary qyzmetkerleri kúnimen quttyqtap, shyǵarmashylyq tabys tiledi. Sóıtip Arystaǵy tosynnan kelgen apattan zardap shekken turǵyndarǵa kórsetilip jatqan gýmanıtarlyq kómek jaıynda jan-jaqty aıtyp berdi.
– Qazaqstan halqy qıyn-qystaý sátteri judyryqtaı jumylyp, eldik pen birliktiń úlgisin kórsetti. Qazaqstan halqy Assambleıasy da 24 maýsymda jedel túrde Shymkent qalasyndaǵy Túrkistan oblystyq Dostyq úıinde zardap shekkender men Arys qalasynan kóshirilgenderge kómek kórsetý maqsatynda shtab qurdy. Barlyq óńirdegi Dostyq úılerinde kómek qabyldaý pýnktteri iske qosyldy. 27 maýsymǵa deıin Assambleıa kórsetken kómektiń jalpy somasy 51 mln 331 myń teńgeni qurap otyr. Sondaı-aq QHA men «Qoǵamdyq kelisim» memlekettik mekemeleri bir kúndik jalaqylaryn Túrkistan áleýmettik-korporatıvtik damý qoryna aýdardy. QHA «Jańǵyrý joly» respýblıkalyq jastar qozǵalysy «Jaqsylyq jasa» jobasy aıasynda Túrkistanǵa kómekke attaný maqsatynda volonterlik top qurdy, – dedi J.Túımebaev
Buǵan qosa QHA Tóraǵasynyń orynbasary aǵymdaǵy jyl saıası oqıǵalarǵa toly bolǵanyn, sondaı sátterde jaǵdaıdy jan-jaqty saraptap, halyqqa shynaıy aqparat jetkizgen tórtinshi bılik ókilderiniń eńbegin atap ótti. Bul rette elimizdegi etnostardyń basylymdary da súbeli úles qosýda. Qazaqstanda qazir 50-den asa etnostyq BAQ resmı tirkelgen. Jyl basynan beri teleradıo men baspasózderde, aqparattyq saıttarda etnosaralyq tatýlyq pen kelisimge qatysty respýblıkalyq jáne aımaqtyq deńgeıde 7218 materıal jarııalanǵan eken.
Jýrnalıster klýbynyń keńeıtilgen otyrysynda Parlament Májilisiniń depýtaty Saýytbek Abdrahmanov, «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli, «Habar» Agenttigi» AQ «El arna» telearnasynyń dırektory Arman Seıitmamyt, «Ognı Alataý» Almaty oblystyq gazetiniń bas redaktory Atsalım Idıgov, «Qazaqparat» HAA bas dırektory Asqar Omarov, «Kore Ilbo» koreı respýblıkalyq gazetiniń bas redaktory Konstantın Kım turaqtylyq pen kelisimdi saqtaýdaǵy BAQ-tyń mańyzdy róli týraly oı-pikirlerin ortaǵa saldy.
Shara sońynda memleket saıasatyn aqparattyq turǵydan qoldaýǵa, qoǵamdyq kelisim men jalpyulttyq birlikti nyǵaıtýǵa, Qazaqstan halqy Assambleıasynyń qyzmetin nasıhattaýǵa úles qosqan jýrnalıster men sarapshylardy marapattaý rásimi ótti.
Sonymen qatar dál osy kúni Dostyq úıinde Nur-Sultan qalasy Qazaqstan halqy Assambleıasynyń XVIII sessııasy ótip, onda birinshi jartyjyldyqta atqarylǵan jumystardyń nátıjeleri jarııalandy. «Halyq ál-aýqatynyń artýy – birlik pen turaqtylyq kepili» dep atalǵan sessııa barysynda Prezıdenttiń «Sabaqtastyq. Ádildik. О́rleý» atty saılaýaldy baǵdarlamasyna arnalǵan jospardy iske asyrý máselesi, sondaı-aq Túrkistan oblysynyń Arys qalasyna kómek kórsetý sharalarynyń jaı-japsary talqylandy.
