«Kazakh Tourism» uıymdastyrýymen Almatydan jasaqtalǵan 25 tájirıbeli shabandoz aldaǵy ýaqytta arnaıy kartasyn syzyp, týrıstik baǵyttardy anyqtaıtyn bolady. Almatydan shyqqan ekspedısııa Batan, Oı-Qaraǵaı shatqaldary, Assy asýy, Qara-Arsha shatqaly, Jińishke ózeni, Amanjol ústirti, Kólsaı, Qaıyńdy kólderi men Qaıyńdy ózeni mańyndaǵy aýmaqtardy aralap, kúnine 10-16 shaqyrymdy júrip ótip, jol boıy nusqaýlyqtar ornatyp, sýretke, beıne taspaǵa túsirý jumystaryn da júrgizetin bolady.
Ekspedısııa múshesi Úkijan Manekınanyń aıtýynsha, atty týrızm Almaty oblysynda jaqsy jolǵa qoıylǵan. Ekspedısııanyń baǵytynan keńirek málimet berip ótken maman týrızmdi damytý úshin aımaqtarda qandaı jumystar isteý kerektigin, turǵyndardyń týrızmdi damytýdaǵy úlesi qandaı bolatyndyǵy, t.b. máselelerge saraptama jasap, ekspedısııa júrip ótken aýmaqtar boıynsha beıne-fotobank jasaqtalatyndyǵynan habardar etti. Adam aıaǵy sırek baratyn aýmaqtardan tájirıbeli fotograftar túsirgen sýretter men beıne toptamalar Qazaqstan týrızminiń jarnamasyn jasaýǵa yqpal etý maqsatynda Kazakh TV kanalynda Across Central Asia baǵdarlamasynda kórsetiletin bolady. Ekspedısııa músheleri taıaýda Aqmola oblysynan oraldy. Al ótken jyly Shyǵys Qazaqstan, Saryarqa, Batys Qazaqstanda, sondaı-aq Almaty oblysynyń birqatar jerlerin aralap, kartasyn jasaqtaǵan. Búginde Qytaıdan, Kýveıtten, Eýropa, t.b. elderden kelgen týrısterdiń áleýmettik paraqshalarynda Qazaqstandy nasıhattaý jumystary da qolǵa qoıylyp keledi.
«Outdoor Kazakhstan» baǵdarlamasynyń avtory ári júrgizýshisi Maksım Levıtın atap ótkenindeı, elimizde atty týrızmdi damytýǵa tolyqqandy jaǵdaı bar. Búginde týrızm qarqyndy damyǵan elderdiń ózindik brendi qalyptasqan. Mysaly, Túrkııa, Taıland sııaqty elder teńizimen tartymdy bolsa, Qazaqstan taýlarymen, ǵajaıyp ólkelerimen kórikti. San ǵasyrlyq tarıhy bar elimizde kez kelgen taýly óńirde atty týrızmdi damytý asa qıyndyq týǵyza qoımaıdy. Búginde Qyrǵyzstan, Monǵolııa sııaqty elder básekelesi bolyp tabylatyn qazaqstandyq atty týrızm bıik taýly qyrattardy baǵyndyrýǵa zor múmkindik beredi. Sondaı-aq, Maksım Levıtın Almaty oblysy men Shyǵys Qazaqstan taýlarynda, tabıǵatynda uqsastyq bolǵanymen, ınfrqurylymy men logıstıkada nazar aýdaratyn máseleler bar ekendigin aıtady. Sondaı-aq Ońtústik Qazaqstan óńirindegi týrzımdi damytýǵa da barynsha kóńil bólgen jón.
Soltústik Tıan-Shanǵa qaraı baǵyt alǵan ekspedısııa birneshe kún boıy aýyl-aımaqtardaǵy turǵyndarmen kezdesip, týrısterdi qabyldaý tártibi jaıynda aqparat almasyp, týrızmdi damytý múmkindikterin saraptap qaıtatyn bolady. Búginde atty týrızmdi damytý taý eteginde ornalasqan eldi mekender úshin tabys kózi bolyp tabylady. Shaǵyn kásipkerlik nysandaryn damytý arqyly, týrısterge sapaly da qolaıly qyzmet túrlerin usyný tipten aımaq ekonomıkasyn damytýǵa da yqpal etetini sózsiz. Bul jaǵdaıda jergilikti ákimdikterdiń shaǵyn jáne orta bıznesti qoldaýdaǵy sharalarǵa nazar aýdarýy asa mańyzdy.
