Chempıonattyń saltanatty ashylý rásimine oblys, quqyq qorǵaý organdarynyń basshylary, «Dınamo» dene shynyqtyrý sport qoǵamy ortalyq keńesiniń ókilderi, Qazaq kúresi federasııasynyń prezıdenti Arman Shoraev, polısııa ardagerleri qatysty.
«Dınamo» DShSQ ortalyq keńesi tóraǵasynyń birinshi basshysy Asqar Omarqulov jarystyń negizgi maqsaty IIM qyzmetkerleriniń dene shynyqtyrý daıarlyqtaryn arttyrýdy, kúres tásilderin jetildirýdi, úzdikterdi anyqtaýdy jáne salaýatty ómir saltyn nasıhattaýdy ditteıtinin atap ótti.
«Qazaq kúresiniń praktıkalyq máni erekshe. Sebebi qazaq kúresin jetik meńgergen quqyq qorǵaý organdarynyń kez-kelgen qyzmetkeri qylmyskerge tosqaýyl qoıa alady», dedi Arman Shoraev.
Pogon taqqan úzdik palýan ataǵy úshin kúres óte tartysty ótti. 82 kılo salmaq dárejesinde Jambyl oblysy polısııa departamentinen kelgen Ámir Habıbýllaev úzdik atandy. 90 kılo salmaqta – Aqmola oblysynan Áset Júnisov, 100 kg deıin – Almaty oblysynan Aleksandr Kosachev jeńimpaz boldy. Aýyr salmaqtaǵylar arasynan Qaraǵandy oblysy polısııa departamentinen kelgen Samat Amantaev eń úzdik dep tanyldy.
Komandalyq esepe ekinshi jáne úshinshi oryndy qaraǵandylyqtar men jambyldyqtar ıelendi. Birinshi oryn Kóliktegi polısııa departamentiniń komandasyna buıyrdy.
Soltústik Qazaqstan oblysy
