Astanalyqtarǵa sertıfıkattardy qala ákimi Altaı Kólginov tapsyrdy. Ol Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń «Prezıdenttiń bes áleýmettik bastamasy» atty halyqqa Úndeýinde aıtylǵan «árbir otbasy úshin turǵyn úı satyp alýdyń jańa múmkindikteri» atty birinshi bastamasynyń mindetterin iske asyrý aıasynda ázirlengen «7-20-25» ıpotekalyq baǵdarlamasyn iske asyrýǵa elorda belsendi aralasqanyn aıtyp ótti.
Sertıfıkattar elordada suranysqa ıe sala mamandaryna, ıaǵnı muǵalimderge, medısına qyzmetkerlerine jáne polıseılerge berildi.
Búginde qalada 17 myń muǵalim bar, olar balabaqshalardyń 55 myń tárbıelenýshisi men 162 myń oqýshysyna bilim beredi.
Sonymen qatar, elordada 20 myń medısına qyzmetkeri jumys isteıdi, onyń 8 myńy – dáriger, 12 myńy – orta medısına qyzmetkeri.
Budan bólek, qoǵamdyq tártipti kún saıyn 8 myń polısııa qyzmetkeri qamtamasyz etedi.
Atalǵan sala mamandary qala turǵyndaryna kómek kórsetip, qoǵamdyq tártip pen qaýipsizdiktiń qorǵalýyn, salaýatty ómir saltyn qalyptastyrýǵa jáne bilim urpaqty tárbıeleýdi qamtamasyz etedi. Altaı Kólginov bıyl 1500 turǵyn úı sertıfıkatyn, onyń 500-i bıýdjettik uıymdardyń qyzmetkerlerine, 1000-y kópbalaly otbasylarǵa tabys etiletinin málim etti.
