Qasym-Jomart Toqaev jańa sport kesheniniń jattyǵý zaldary men ınfraqurylymyn aralap kórdi. Elordanyń ózge ǵımarattary sekildi bul nysan da erekshe. «Jekpe-Jek» saraıynda balalarmen qatar, eresekter de jattyǵa alady. Buǵan qosa «Jekpe-Jek» saraıy sportshylardy daıyndaýǵa boks, kúres, dzıýdo, aýyr atletıka jáne sporttyń basqa da túrlerinen saıystar ótkizýge arnalǵan. Al sport zalyna 5 myń kórermen syıady. Sport kesheninde 25 metrlik basseın, fıtnes-ortalyǵy, qonaqúı men mını-fýtbol alańy da bar.
Sondaı-aq Qazaqstan Prezıdenti Jastar jylyn atap ótý aıasynda «Jekpe-Jek» saraıynda elorda kúnine arnalǵan jekpe-jek óneriniń gala-festıvaline qatysty. Qazaqstannyń jekpe-jek óneri qaýymdastyǵynyń uıymdastyrýymen ótken festıval barysynda jas sportshylar kásibı jekpe-jek ónerinen qoıylymdar kórsetti.
Jarystyń ashylý saltanatynda Mádenıet jáne sport mınıstri Aqtoty Raıymqulova jańa nysannyń el sportyn damytýdaǵy mańyzyna toqtaldy. «Jekpe-Jek» saraıy memleketimizdiń tikeleı qoldaýymen qamqorlyǵynyń arqasynda ashyldy. Elimizde deneshynyqtyrý jáne sporttyń damýyna barlyq jaǵdaı jasalǵanyn aıtty. «Bul sala búgingi tańda mańyzdy áleýmettik-ekonomıkalyq sala retinde aıaǵynan nyq turdy dep aıtýǵa bolady. Osy sózimniń aıqyn dáleli – Elbasy Nursultan Nazarbaevtyń bastamasymen salynǵan búginde esigin birinshi ret aıqara ashyp otyrǵan «Jekpe-Jek» saraıy qutty bolsyn!», dedi mınıstr.
«Jekpe-Jek» sport kesheni halyqaralyq sport federasııalarynyń talaptaryna saı salynyp, qurylys kezinde qýat únemdeý júıesi, jeldetý men jaryq túsirý máseleleri eskerilip, tyń ınnovasııalyq ınjenerlik sheshimder qabyldanǵan. Ǵımarattyń úshburyshty pishimi Qazaqstannyń erkindigi men qýatynyń sımvolyna aınalǵan búrkittiń kókke qanat qaqqan sátin beıneleıdi.
