– Arys qalasynyń irgeles aýmaǵynda jáne tikeleı arsenal aýmaǵynda jergilikti turǵyndardyń qońyraý shalýy úshin 42 mobıldik top quryldy, – dedi Qorǵanys mınıstriniń orynbasary.
Onyń aıtýyna qaraǵanda, qazirgi ýaqytta oq-dári qaldyqtaryn joıý jumystary bastalǵan.
– Qarýly Kúshterdiń ınjenerlik áskerler bólimsheleri tańǵy 9.00-den 18.00-ge deıin jumys isteıdi. Tıisti qujattarǵa sáıkes tasymaldaýǵa kelmeıtin oq-dárilerdiń qaldyqtary arsenal aýmaǵynda joıylady, al qalǵany Arys qalasynan soltústikke qaraı 60 shaqyrymdaı qashyqtyqqa shyǵarylyp, arnaıy jabdyqtalǵan polıgonda joıylady, – dedi T.Dándibaev.
Mınıstrlik ókiliniń aıtýynsha, oq-dárilerdiń qaldyqtaryn joıý barysynda jarylystyń dúńkildegen daýysy shyǵýy múmkin, biraq ol dybysqa alańdaý men úreılenýge negiz joq.
– Qazaqstan Prezıdenti – Qarýly Kúshterdiń Joǵarǵy Bas qolbasshysynyń tapsyrmasynyń negizinde áskerı bólimdi de kóshirý jumystary bastalyp ketti, – dedi general-maıor.
Mınıstrlik ókili qalany tazalaý, oq-dárilerdiń bólshekterin zalalsyzdandyrý, áskerı bólimdi kóshirý jumystary tikeleı Qorǵanys mınıstriniń baqylaýynda ekenin jetkizdi.
Sonymen qatar mınıstrdiń orynbasary qazir qala aýmaǵynda saperlar bólimshesi jumys istep jatqanyn, ushqyshsyz basqarylatyn ushý apparattarynyń jiberilgenin, sol arqyly arsenal ornalasqan jáne oǵan japsarlas aýmaq baqylaýǵa alynǵanyn baıandady. Oǵan qosa, qarý-jaraq bólshekterine kezikken adamdardyń habarlamasyn qabyldaý maqsatynda arnaıy ınjenerlik-saperlik beketter qurylǵan.
Qorǵanys mınıstriniń orynbasary áskerı qyzmetshiler úılerine oralǵan Arys qalasy turǵyndaryna kómek berip jatqanyn málimdedi.
