Kásipkerlik jáne týrızm basqarmasynyń basshysy Quralaı Jarovanyń aıtýynsha, azyq-túlik, kıim-keshek, jıhaz ben elektronıkany óndirýmen aınalysamyn degender úshin el boıynsha nesıelendirýge 600 mıllıard teńge kóleminde qarajat qarastyrylǵan. Mehanızm byltyr jeltoqsan aıynda iske qosylǵanymen, óńirde bar-joǵy 2 joba ǵana qarjylandyrylypty.
«Qarjylandyrýdyń jańa mehanızmi boıynsha aýdandar men Petropavl qalasy ákimdigi 73 joba usyndy. Olardyń quny 59,5mıllıard teńgeni quraıdy. Ekinshi deńgeıli bankterdiń qaraýyna 1 mıllıard 150 mıllıon teńgeniń 3 ótinishi berildi», deıdi Q.Jarova.
Alaıda, Aqjar, Tımırıazev, Mamlıýt, Shal aqyn aýdandarynda qozǵalys múldem baıqalmaıdy. Aýdan atqaminerleri ótinishter bank qaraýyna jiberildi dep aqtalǵanymen, bul aqparattardy qarjy ınstıtýttary rastaı almaǵan. Jergilikti jerlerde qarapaıym zattar ekonomıkasy sanatyna jatatyn taýarlardyń satylmaýy turǵyndardyń belsendiligine keri áser etip otyr.
Memlekettik mekemeler ózderiniń jumystaryna qajetti dúnıelerdi satyp alýǵa 840 mıllıon teńge jumsaǵan. Onyń ishinde jergilikti jerde óndirilgen taýarlarǵa tek 22,6 mıllıon teńge ǵana baǵyttalǵan. Bul – jalpy somanyń 2,7 paıyzy ǵana.
Bıyl memlekettik satyp alýlardaǵy jergilikti taýar úlesin 20 prosentke deıin jetkizý mindeti tur.
