Álem • 10 Shilde, 2019

Senatorlar EYQU Parlamenttik Assambleıasynyń 28-shi sessııasyna qatysty

168 ret kórsetildi

Parlament Senatynyń depýtattary Tóleýbek Muqashev, Dýlat Qusdáýletov, Mıhaıl Bortnık, Ǵumar Dúısembaev jáne Májilis depýtaty Quralaı Qaraken EYQU Parlamenttik Assambleıanyń Lıýksembýrgte ótken jyl saıynǵy 28-shi sessııasyna qatysty.

Bıylǵy otyrystyń taqyryby qaýipsizdikti nyǵaıtý jolyndaǵy turaqty damýǵa járdemdesýdegi parlamentshilerdiń roline arnaldy. Depýtattar Turaqty komıtettiń, Saıası jáne qaýipsizdik máseleleri jónindegi jalpy komıtettiń, Ekonomıkalyq máseleler, ǵylym, tehnologııalar jáne qorshaǵan orta jónindegi jalpy komıtettiń, Demokratııa, adam quqyqtary jáne gýmanıtarlyq máseleler jónindegi jalpy komıtettiń otyrystaryna qatysty.

T.Muqashev qazaqstandyq delegasııanyń basshysy retinde Assambleıanyń jalpy otyrysynda sóz sóıledi. Senator óz sózinde zamanaýı qaýipterdiń kúsheıýi aıasynda EYQU Astana sammıti murasynyń mańyzdylyǵyn atap ótip, Qazaqstandaǵy saıası jáne ekonomıkalyq ózgerister úderisteri týraly habardar etti.

Otyrys aıasynda Qazaqstan delegasııasy EYQU PA basshylyǵymen kezdesip, taraptar Qazaqstannyń EYQU jáne onyń Parlamenttik Assambleıasymen yntymaqtastyǵyn odan ári nyǵaıtý joldaryn talqylady. Senat depýtattary sondaı-aq Avstrııa, Reseı, Belarýs, О́zbekstan, Shveısarııa, Ispanııa jáne Portýgalııalyq áriptesterimen kezdesip, «Násilshildik, jatsyný jáne solarǵa baılanysty tózimsizdikti kúsheıtýge yqpal etetin ásire ultshyldyq jáne basqa da kórinistermen kúres» taqyrybyndaǵy dóńgelek ústelge jáne birqatar sharalarǵa qatysty.

EYQU PA jyl saıynǵy otyrystarynyń qorytyndysy boıynsha Lıýksembýrg deklarasııasy qabyldandy.

Uqsas jańalyqtar