Áskerı vedomstvo basshysynyń aıtýynsha, komıssııa quramyna joǵary bilikti áskerı mamandar, órtke jáne dıversııaǵa qarsy qaýipsizdik máselesinde tıisti tájirıbesi bar Qarýly Kúshterdiń ardagerleri kirgizilgen.
– О́ıtkeni Qazaqstan aýmaǵynda basqa da oq-dáriler qoımalary bar. Olardyń kólemi Arystaǵydan az bolǵanymen, bizdiń mindetimiz osyndaı jaǵdaıdy boldyrmaý, – dedi Qorǵanys mınıstri.
Endi komıssııa Qarýly Kúshterdiń oq-dári saqtalatyn barlyq nysandarynda oq-dárini saqtaý jaǵdaıy men tártibin, órt qaýipsizdigi talabynyń saqtalýyn jiti tekseredi.
Sondaı-aq oq-dárini saqtaý nysanyndaǵy qaýipsizdik deńgeıin arttyrý sharasyn aıqyndap, tájirıbelik kómek kórsetpek.
– Qazirgi ýaqytta oq-dáriler men jarylǵysh zattardy saqtaý ornynda qaýipsizdikti qamtamasyz etý úshin barlyq sharalar qabyldanýda, – dedi N.Ermekbaev.
Mınıstrdiń aıtýynsha, qazir Arys qalasyndaǵy arsenaldan jarylmaǵan oq-dárilerdi shyǵarý jumystary da júrgizilýde. Oǵan qosa ushqyshsyz basqarylatyn ushý apparattary jáne tikushaqtarmen kún saıyn arsenal aýmaǵyna, irgeles jerge áýeden barlaý, monıtorıng júrgizilýde.
Sondaı-aq Arys qalasyndaǵy oq-dári qoımasynda bolǵan jarylystan soń Shymkent, Taraz, Býrnyı, Merki, Otar qalalarynan kelgen saperler qalany tazartý jumysyna birden kirisken.
Brıfıng barysynda mınıstr Arystaǵy órtke jaýapty mamandardyń salaqtyǵy, órt qaýipsizdigi talaptarynyń saqtalmaýy, toqtyń qysqa tuıyqtalýy men qatar, qasaqana órteý sebep bolýy múmkin ekenin jetkizdi.
Mınıstrdiń aıtýynsha, atalǵan tótenshe oqıǵa boıynsha árbir jaýapty tulǵanyń jeke jaýapkershiligi anyqtalmaq.
Jalpy, sońǵy 10 jyl ishinde atalǵan arsenaldan 180 myń tonna qarý-jaraq pen oq-dári shyǵarylǵan.
Sóz arasynda Qorǵanys mınıstri jaýapkershilikten qashpaıtynyn jetkizdi.
