Qazaqstannyń halyq ártisi, Memlekettik syılyqtyń laýreaty Ǵarıfolla Qurmanǵalıevtiń mereıtoıy Aq Jaıyq óńirinde eki kúndik sharalarmen atalyp ótti. Bıyl tórtinshi márte uıymdastyrylǵan «Jeztańdaı, kúmis kómeı án dúldili» atty respýblıkalyq baıqaýǵa Qazaqstannyń ár óńirinen kelgen 22 ónerpaz jáne mereıtoı meımandary áýeli Oral qalasyndaǵy Ǵarekeń eskertkishine gúl shoǵyn qoıyp, taǵzym etti. Odan keıin Qadyr Myrza Álı atyndaǵy mádenıet jáne óner ortalyǵynda «Dástúrli ánshiliktiń darabozy» atty dóńgelek ústel májilisi ótti.
- Dástúrli óner, ásirese qazaqtyń ulttyq án ónerin úırený, oǵan qyzyǵý úshin tálim berer ustazdyń orny erekshe ǵoı. 1965 jyly Almatyda ashylǵan estrada-sırk stýdııasynda bizge eń birinshi sabaq bergen – Ǵarekeń edi. Ol – men úshin óte qymbat adam! – deıdi Qazaqstannyń halyq ártisi, Qoja Ahmet Iаssaýı atyndaǵy qazaq-túrik ýnıversıtetiniń oqytýshysy Qajybek Bekbosyn.
Aqyn Tólegen Aıbergenov «Kókiregine ásem ánniń kók muhıtyn shaıqaǵan» dep baǵa bergen sańlaq ánshi týraly Qazaqstan Respýblıkasynyń eńbek sińirgen artısi Qapash Qulysheva, Qazaqstan Respýblıkasynyń mádenıet qaıratkeri Gúlmaıdan Súndetova, Qazaqstan Respýblıkasynyń mádenıet qaıratkeri, Murat О́skenbaev atyndaǵy Mańǵystaý oblystyq fılarmonııasynyń qyzmetkeri, ánshi Baýyrjan Satybaldın, Dına Nurpeıisova atyndaǵy Atyraý akademııalyq orkestriniń kórkemdik jetekshisi Qaırat Kákimov, Sultanmahmut Toryaıǵyrov atyndaǵy Pavlodar memlekettik ýnıversıtetiniń professory Qazaqstan Respýblıkasynyń eńbek sińirgen qaıratkeri Erbol Aıtbaev jáne basqalary óz estelikterin aıtty. Al ánshiniń nemeresi, óner zertteýshisi Merýert Qurmanǵalıevanyń pikirinshe, Ǵarıfolla Qurmanǵalıev qazaq halqynyń ǵana emes, tutas túrki áleminiń mýzykasyn damytýǵa zor úles qosqan tulǵa.
Ánshi mereıtoıynyń alǵashqy kúni Qadyr Myrza Álı atyndaǵy mádenıet jáne óner ortalyǵynyń amfıteatrynda «Án urpaqqa amanat» atty festıvalmen aıaqtaldy. Munda Qazaqstannyń ár óńirinen kelgen Ǵarıfolla Qurmanǵalıevtiń shákirtteri men basqa da ánshiler óz ónerlerin kórsetti.
Mereıtoılyq sharalardyń ekinshi kúni ánshiniń týǵan jeri Qaratóbe óńirinde jalǵasty. IV respýblıkalyq «Jeztańdaı, kúmis kómeı án dúldúli» atty dástúrli ánshiler baıqaýynyń ashylý saltanatyna óńir basshysy Ǵalı Esqalıev arnaıy bardy. Nur-Sultan men Almaty, Semeı qalalarynan, Qyzylorda, Atyraý, Aqtóbe, Mańǵystaý jáne Batys Qazaqstan oblystarynan jınalǵan 22 ónerpaz ánshi baıqaýda baq synady. Baıqaý sharty boıynsha ánshiler Muhıt pen Ǵarıfolla týyndylaryn jáne óz aımaǵynyń ánin oryndady. Alǵashqy synnan 12 ánshi súrinbeı ótti. Ekinshi týrdan keıin baıqaý júldegerleri anyqtaldy. Qazaqstan Respýblıkasynyń halyq ártisi Qajybek Bekbosyn bastaǵan qazylar alqasy baıqaýdyń bas júldesine Nur-Sultan qalasynan kelgen Aıdana Qarjaýbaevany laıyq dep sheshti. Atyraýlyq Berik Amantaev birinshi orynǵa ıe boldy. Mańǵystaý oblysynyń namysyn qorǵaǵan Nurys Asqanov pen Batys Qazaqstan oblysynyń Aqjaıyq aýdanynan kelgen Danııar Eleýov ekinshi oryndy bólisti. Aqtóbelik Ádilet Kúzembaev, syrymdyq Armat Aldamjarov, qaratóbelik Nurshat Islamǵalıev úshinshi orynǵa ıe boldy. Beıbit Qajyǵalıev, Tilek Bazarov, Kenesary Mızamov, Juldyz Súndetqalıeva, Ázimhan Baımaǵambetov baıqaýdyń dıplomaty atandy.
Eki kúndik sharalardyń qorytyndysyna aınalǵan gala-konsertte baıqaý júldegerlerimen birge ánshiniń shákirtteri Qajybek Bekbosyn, Haıdar О́teǵalıev, Qapash Qulyshevalar án shyrqady.
Batys Qazaqstan
