Jıynda sóz alǵan shymkenttik «Ordabasynyń» bas bapkeri Kahaber Shadadze komandanyń erteńgi oıynǵa tas túıin daıyn ekenin jetkizdi.
«Torpedo» Kýtaısı - qarymdy komanda. Biz komandanyń sońǵy úsh jylda óz elindegi múmkin bolǵan júldelerdiń barlyǵyn utqanyn jaqsy bilemiz. Komanda el chempıonaty, kýbok pen Sýper kýbokti jeńdi, al ótken jyly ishki chempıonatta ekinshi oryn ıelendi. Qazir de komandada oıynshylar aýysyp jatyr eken. Degenmen, oıynda jeńýge «Ordabasynyń» tájirıbesi jeterlik. Bizdiń jigitterdiń kóńil kúıi jaqsy. Jaraqattan amanbyz. Ár match biz úshin mańyzdy. Sondyqtan aldaǵy oıynda jeńiske jetýge bar kúshimizdi salamyz», dedi bas bapker.
«Ordabasynyń» kapıtany Mardan Tólebek: «Alǵashqy matchta Shymkentte oınaǵaly turmyz. Bul, bir jaǵynan bizge de jiger beredi dep oılaımyn. Sebebi, jankúıerlerdiń qoldaýy árqashanda mańyzdy. Barshańyzdy oıyndy tamashalaýǵa shaqyramyn», dedi.
Qarsylas komandanyń bas bapkeri Kahaber Chhetıanı bolsa: «Oıyndaryńyzdy buǵan deıin tamashaladyq. «Ordabasy» - osal emes, myqty klýb. Komandalaryńyzda bir-birin jaqsy túsinetin sheber fýtbolshylar bar. Bárin jasyl alań kórsetedi», dep qysqa qaıyrdy.
Aıta ketsek, shymkenttik «Ordabasyǵa» qarsylas atanǵan Grýzııanyń «Torpedosy» qaıbir jyldary KSRO Birinshi lıgasynda chempıon atanyp, Joǵary lıgada 13 maýsym óner kórsetken. Grýzııa táýelsizdigin alǵan soń «Torpedo» Ýmaglesı lıgasynda tórt márte chempıon bolǵan. Eýrododaǵa 1998 jyldan beri qatysyp keledi. 2012/13 jylǵy maýsymda Eýropa lıgasynyń alǵashqy irikteý kezeńinde «Aqtóbemen» kezdesken. Qos matchtyń qorytyndysy boıynsha 2:1 esebimen ese jiberip, jarys jolynan shyǵyp qalǵan. Tarıhyndaǵy úzdik kórsetkishke byltyr qol jetkizgen. Eýropa lıgasynyń toptyq kezeńine bir qadam jerde Bolgarııanyń «Lýdogores» komandasynan jeńilip qaldy.
Aıta keterligi, «Ordabasy» men «Torpedo» (Kýtaısı) komandalary arasyndaǵy kezdesý Nur-Sultan ýaqytymen 20.00-de bastalady. Oıyn Qazsport telearnasynan tikeleı efırde kórsetiledi. Qarymta kezdesý 18 shildede ótkiziledi. Bul juptyń jeńimpazy ekinshi irikteý kezeńinde Chehııanyń «Mlada Boleslav» komandasymen 25 shilde jáne 1 tamyz kúnderi sheberlik baıqasady.
