Qordyń qarajatyna árqaısysy eki otbasyna arnalǵan «dýpleks» tıpti 50 turǵyn úı salynady dep josparlanyp otyr. Igi bastamanyń demeýshileri qurylystyń tapsyrys berýshileri retinde ony tikeleı óz baqylaýyna alady. Merdiger uıym da tańdalyp qoıypty. Kózdelgen sharýa qyrkúıek aıynyń orta tusyna qaraı aıaqtalmaq. Qor ókilderi, qurylys bitken soń qajetti turmystyq tehnıkamen tolyqqandy sanıtarlyq toraptarmen jaraqtalǵan baspana qonystanýǵa daıyn bolatynyn aıtady. Turǵyzylatyn úıdiń aýdany 10 sotyq jer teliminen turatyndyqtan, ár otbasy óz baý-baqshasynda jemis-jıdek pen kókónis túrlerin ósiredi.
«Búkil Qazaqstan Arysta bolǵan jaǵdaıǵa qaıǵyrdy, bul oqıǵa elimizdiń árbir azamatyn eleńdetti. Biz otandastarymyzǵa qoldaý kórsetip, qalany qalpyna keltirýge óz úlesimizdi qosqymyz keledi. Sondyqtan qordyń quryltaıshysy baspanaǵa muqtaj qazaqstandyqtar úshin úılerdiń qurylysyna baǵyttalǵan «Balameken» jobasyn keńeıtýge jáne jalǵastyrýǵa sheshim qabyldady. Joba aǵymdaǵy jyldyń kókteminde Qyzylordada bastalǵan bolatyn. Onda qor bólgen aqshaǵa 100 turmysy tómen otbasy úshin baspana turǵyzyldy. О́zimiz Qyzylordada qoldanǵan oń tájirıbeni endi Arysta qoldanamyz», – deıdi Bolat О́temuratov qorynyń dırektory Marat Aıtmaǵanbetov.
Sol sekildi shaǵyn aýdannyń qurylysyna arnalǵan jer ýchaskesi belgilenip, qajetti ınfraqurylymdyq jeliler de salynatynyn aıtady qaıyrymdylyq qor músheleri. Buǵan deıin atalǵan úkimettik emes uıym Arystaǵy apattan zardap shekken 2 myń turǵynǵa «Kómek kartasy» jobasy negizinde 60 mln teńge bóletinin habarlaǵan-dy. Bul soma kóp balaly otbasylarǵa jáne múmkindigi shekteýli jandarǵa beriledi.
Aıta keteıik, ótken aıda Arys qalasyndaǵy áskerı bólimshede oq-dári qoımasy jarylyp, úsh adam qaıtys bolǵan. Búginde atalǵan aımaqta tótenshe jaǵdaıdyń saldaryn retteý boıynsha jumys júrgizilip jatyr.
Jaqsylyq MURATQALI,
«Egemen Qazaqstan»
