Olar Qazaqstan táýelsizdigi, Tuńǵysh Prezıdent Nursultan Nazarbaevtyń ómiri men qyzmeti týraly fotosýretter men arhıvtik qujattardan turatyn ekspozısııalarmen jan-jaqty tanysty. Jas qonaqtarmen Elbasy kitaphanasynyń dırektory Ámirhan Rahymjanov suhbat qurdy. «Sizder beıbit býynnyń baqytty ókilisizder. Atamekenniń topyraǵyn basyp, babalar jeriniń gúldenip, kórkeıgenin, Qazaqstannyń bıik shyńdardy baǵyndyryp jatqanyn kórdińizder. Denderińizdiń saý, oqýlaryńyzdyń jemisti bolýyn tileımin! Beıbitshilik pen jasampazdyqqa, damýǵa bet alǵan laıyqty azamat bolyńyzdar. Qazaqstanǵa saparlaryńyz umytylmastaı ótsin!», dedi balalarǵa aq tilegin arnaǵan Á.Rahymjanov.
Jasóspirimder kitaphananyń kınozalynda «Ádilettiń aq joly», «Beıbitshilik kindigi», «Eýrazııa júreginde» atty Elbasynyń shyǵarmalary jelisimen túsirilgen «Balalyq shaǵymnyń aspany» kórkem fılmin tamashalady. Elbasy kitaphanasynan estelik retinde balalarǵa «Bizdiń Prezıdent» kitaby tartý etildi.
«Qazaqstannyń astanasy bárimizge umytylmas áser qaldyrdy. Eki jyldan soń mektepti bitiremin, bolashaqta dáriger bolsam deımin. Osy maqsatyma jetý úshin Nur-Sultan qalasyndaǵy joǵarǵy oqý oryndarynyń birine túskim keledi. Keleshek ómirimdi atajurtymda elestetemin. Ásirese týystarym turatyn Aqtaý qalasy qatty unady», deıdi Irannan kelgen Istgaldy Hastı. Bolashaqta babalarynyń izi qalǵan topyraqta ómir keshýdi armandaıtyn taǵy bir jetkinshek Darııa Týǵambekova. «Nursultan Nazarbaev álemge tanymal tulǵa. Onyń bastamasymen salynǵan Elorda ásemdigi men qarqyndy damýymen kóz súrindiredi. Qaı jerde júrsem de tarıhı Otanym máńgi júregimde. Qazaq mádenıeti men ádebıetin, kóshpendiler fılosofııasyn unatamyn. Bizge tán bul ereksheligimiz qazaq ekenimizdi kez kelgen jerde, tólqujatymyzdyń túsine qaramastan birden bildirip turady», deıdi Qyrǵyzstannan kelgen qarshadaı qyz.
Jazǵy lagerge qatysqan oqýshylar aldaǵy ýaqytta el astanasyndaǵy barlyq mádenı, tarıhı nysandarmen tanysatyn bolady. Sondaı-aq olar «Býrabaı» memlekettik ulttyq tabıǵı saıabaǵyna, «Botaı-Býrabaı» aspan asty murajaıyna jáne «ALJIR» memorıaldy-murajaı keshenine barady.
