Qazirgi kúni óńirdegi iri kompanııalar ókilderi men qaıyrymy mol jandar atalǵan esepshotqa qarajat aýdarýdy odan ári jalǵastyrýda. Búgingi kúni Arys qalasynyń kóshelerinde oq-dári jarylysy saldarynan búlingen nysandardy qalpyna keltirý jumystary qyzý júrgizilip jatqany málim. Osyndaı saýaby men shapaǵaty mol istiń súbeli úlesi aqtóbelik qurylysshylardyń úlesine tıedi. Olar óz isterin 12 aýmaq boıynsha júrgizýde. Buǵan 765 turǵyn-úı jáne 5 áleýmettik nysan engizilgen eken. Búginde onyń bárine shuǵyl ári sapaly túrde tıisti zertteý men anyqtaý jumystary júrgizilgen. Sol kezde apat bolǵan ýaqytta 472 turǵyn úıge ár túrli deńgeıde zalal kelgeni anyqtaldy. Olardyń bárine tıisti aqaýly aktisi jasalǵan. Sondaı-aq tehnıkalyq tekserýlerdiń nátıjesi 3 úıge snarıad túsip, tolyqtaı búlingenin aıǵaqtap otyr. Sondyqtan onyń 3-ýi de qaıtadan qalpyna keltirý nysandarynyń tizimine kirmeıdi. Iаǵnı bul úılerdiń turǵyndary úshin jańa baspanalar turǵyzylýda. Qazirgi kezde Aqtóbeden arnaıy attanǵan mamandandyrylǵan brıgadalar tıisti qurylys-montaj jumystaryn júrgizilýde. Sonymen birge óńirden kelgen ózge merdigerlik uıymdar Arys qalasynyń Jánibekov kóshesindegi 12 páter men 1 jeke turǵyn-úıdiń shatyrlaryn aýystyrý jumystaryn atqarýda. Osylaısha qazirgi kezde aqtóbelikterdiń kómegimen zalal kelgen 238 baspana tolyqtaı qalpyna keltirildi. Bul isterdi atqarýǵa 58 maman jáne 7 arnaıy tehnıka birligi jumyldyrylǵan.
Aqtóbe oblysynyń ákimi Ońdasyn Orazalın Arys qalasyna arnaıy baryp, atalǵan 12 aýmaqtaǵy jóndeý jumysynyń jaı-kúıimen tanysýy – úlken janashyrlyq pen qamqorlyqtyń belgisindeı áser qaldyrdy. Sonymen birge óńir basshysy apat kezinde qaza tapqan 2 azamattyń otbasyna kóńil aıtyp, olarǵa moraldyq jáne materıaldyq turǵydan qoldaý kórsetti.
Oblys ákiminiń aqtóbelik merdiger uıymdarǵa qoıǵan talaby men tapsyrmasy bireý ǵana – bul barlyq jumystardyń sapaly atqarylýy jáne óz ýaqytynda aıaqtalýy bolyp otyr.
