Narıman Qypshaqbaıulynyń eńbek joly ýchaskelik ınjener-gıdrotehnık qyzmetinen bastalǵan. 1974 jyldan táýelsizdik alǵanǵa deıin Qazaq KSR Melıorasııa jáne sý sharýashylyǵy mınıstrligin basqardy. QR Tuńǵysh Prezıdenti N.Á.Nazarbaevtyń jarlyǵymen 1990 jyly Sý resýrstary memlekettik komıtetiniń tóraǵasy bolyp taǵaıyndalǵan. Táýelsizdik jyldary Sý kodeksi jobasynyń ázirlenýine jetekshilik jasap, Ortalyq Azııa, Reseı Federasııasy jáne Qytaı memleketteri arasynda transshekaralyq ózenderdegi sý resýrstaryn paıdalaný jóninde halyqaralyq uıymnyń qurylýyna, sonyń ishinde Qazaqstan, Qyrǵyzstan, Tájikstan, Túrkimenstan, О́zbekstan memleketteriniń prezıdentterimen qurylǵan Halyqaralyq Araldy qutqarý qorynyń qurylýyna úlesi zor.
«Elbasynyń tikeleı tapsyrmasymen júzege asyp, ǵasyr jobasy atanǵan «Syrdarııa ózeniniń arnasyn retteý jáne Aral teńiziniń soltústik bóligin saqtaý» (SARATS) jobasy birinshi fazasynyń júzege asýyna Narıman Qypshaqbaıulynyń erekshe úles qosqandyǵyn Aral óńiriniń turǵyndary jaqsy biledi. Zeınetke shyqqannan keıin de jıǵan-tergen baı tájirıbeńizdi izińizden ergen jastarǵa úıretýden jalyqqan emessiz. Sonyń ishinde, Syr óńiriniń sý sharýashylyǵynyń ózekti máselelerin sheshý jumystaryna da aıanbaı atsalysyp kelesiz», dep atap ótti oblys ákimi.
Sondaı-aq áriptesteri men sý sharýashylyǵynyń ardagerleri Serikbaı Saǵymbaev jáne Begesh Jaqyp mereıtoı ıesine jyly lebizderin jetkizdi.
Saltanatty keshte sóz alǵan Narıman Qypshaqbaıuly oblys basshylyǵy men zamandastaryna qurmet kórsetkeni úshin alǵysyn bildirdi.
