Otyrysty ashqan Qasym-Jomart Toqaev bıylǵy birinshi jartyjyldyǵyndaǵy elimizdiń áleýmettik-ekonomıkalyq damý qorytyndylaryna toqtaldy.
– Qańtar-maýsym aralyǵynda jaqsy kórsetkishterge qol jetkizdik dep aıtýǵa bolady. Atap aıtsaq, ekonomıkalyq ósim 4,1 paıyzdy qurady. Inflıasııanyń jyldyq kórsetkishi 5,4 paıyz boldy. Negizgi kapıtalǵa salynǵan ınvestısııalardyń kólemi 11,7 paıyzǵa ósti. Árıne, atalǵan ekonomıkalyq kórsetkishterdiń barlyǵy halyqtyń turmysyna oń yqpal etýi tıis, – dedi Memleket basshysy.
Jıyn barysynda Premer-Mınıstr A.Mamın, Ulttyq banktiń tóraǵasy E.Dosaev, Indýstrııa jáne ınfraqurylymdyq damý mınıstri R.Sklıar, Eńbek jáne halyqty áleýmettik qorǵaý mınıstri B.Saparbaev, Aýyl sharýashylyǵy mınıstri S.Omarov, Túrkistan oblysynyń ákimi О́.Shókeev, Qaraǵandy oblysynyń ákimi E.Qoshanov jáne Atyraý oblysynyń ákimi N.Noǵaev baıandama jasady.
Qazaqstan Prezıdenti spıkerlerdiń nazaryn bank sektoryndaǵy máselelerge, qıyn jaǵdaıǵa tap bolǵan azamattardyń tutyný kredıtterine qatysty qaryz júktemelerin tómendetý sharalaryn júzege asyrý mindetine aýdardy. Sondaı-aq, kommýnaldyq qyzmet kórsetý jáne turǵyn úı qoryn basqarý máseleleri boıynsha turǵyndar tarapynan túsken aryz-shaǵymdardyń kóptigin atap kórsetti.
Memleket basshysy Túrkistan oblysynyń ákimi О́.Shókeevtiń baıandamasyna toqtalyp, óz tapsyrmasy boıynsha qajetti qarjy bólingenin aıtty.
– Ýaqyt óte tyǵyz. Biz bul jumystardy qysqa merzim ishinde aıaqtaýymyz kerek. Elimizdiń azamattary, memlekettik organdar, úkimettik emes uıymdar, óńirler, otandyq bıznes jáne birqatar sheteldik ınvestorlar zardap shekkenderge materıaldyq jáne moraldyq qoldaý kórsetti. Bul – halqymyzdyń bereke-birliginiń arqasy jáne tutastyǵymyzdyń kórinisi. Bárine zor rızashylyǵymdy bildiremin, – dedi Qazaqstan Prezıdenti.
Qasym-Jomart Toqaev Qorǵanys mınıstrligine áskerı qoımalardy kóshirý jumystaryn shuǵyl túrde bitirý qajet ekenin aıtty.
Memleket basshysy Arystaǵy jarylysqa kinálilerdiń barlyǵyn jazalaýdy tapsyrdy. Sondaı-aq, áskerı vedomstvoǵa baqylaýdy álsiretkeni jáne jarylysqa jol berilgeni úshin Qorǵanys mınıstri N.Ermekbaevqa qatań sógis jarııalady.
– Qazir oqıǵany zertteý úshin arnaıy komıssııa jumys istep jatyr. Komıssııa jumysynyń qorytyndysy boıynsha Prezıdent Ákimshiligi men Qaýipsizdik Keńesi kinálilerdiń bárin qatań jazalaý jóninde usynys engizýi qajet. Bul qaýiptiligi joǵary nysandarǵa jaqyn jerge qurylys jumystaryn júrgizýge ruqsat bergen azamattyq memlekettik qyzmetshilerge de qatysty. Kinálilerdiń bári qatań jaýapqa tartylyp, jazalanýy tıis, – dedi Qasym-Jomart Toqaev.
Qazaqstan Prezıdenti 20 tamyzǵa deıin basqa da osyndaı nysandarǵa egjeı-tegjeıli taldaý jasaý úshin Qorǵanys mınıstrligine, sondaı-aq, eskertýler men tótenshe jaǵdaılardy joıýǵa jaýaptylardyń fýnksıonaldyq daıyndyqtaryn jáne qyzmettiń tıimdiligin arttyrý jóninde Úkimetke tapsyrma berdi.
Baıandamalardy tyńdaǵan Memleket basshysy Úkimettiń, Ulttyq banktiń jáne óńirler ákimderiniń jumystaryna oń baǵa berdi. Qasym-Jomart Toqaev qorytyndy sózinde baǵdarlamalyq qujattar men saılaýaldy baǵdarlamanyń júzege asyrylý tıimdiligin arttyrý qajettigin aıtty.
Sonymen qatar, Memleket basshysy saılaýaldy baǵdarlamany júzege asyrý úshin jasalǵan Úkimettiń jobalyq ofısiniń jumysymen tanysty. Qasym-Jomart Toqaevqa Jobalyq ofısti uıymdastyrýdyń negizgi joldary, basym baǵyttary, maqsattary men mindetteri jóninde málimet berildi.
Memleket basshysy baıandamasynyń tolyq mátinin myna silteme boıynsha oqı alasyzdar.
