Sport • 18 Shilde, 2019

Toqsany baryp toǵyz medal ala almady

135 ret kórsetildi

Italııanyń Neapol qalasynda XXX Jazǵy Ýnıversıada-2019 oıyndary aıaqtaldy. Úshinshi shildede jalaýy jelbiregen baıraqty básekege álemniń 112 elinen kelgen 6000-ǵa jýyq stýdentter sporttyń 18 túri boıynsha synǵa túsken bolatyn.

Qazaqstan ulttyq quramasynyń sportshylary sporttyń 10 túri boıynsha el namysyn qorǵady. Ýnıversıada oıyndaryna úlken qurammen attanǵandar qatarynda semserlesý sportynyń 18 ókili Italııa tórinde baq synap, birde-bir medal oljalaı almady. Sondaı-aq jeńil atletıkadan synǵa túsken 16 sportshymyzdyń ishinen tek Mıhaıl Lıtvın ǵana kúmis medal jeńip aldy. Stýdentter dodasyna 15 sportshymen barǵan taekvondoshylar da bir kúmisti qanaǵat tutýǵa májbúr boldy. 87 kıloǵa deıingi salmaqta beldesken Smaıyl Dúısebaı fınalda qarsylasyna ese jiberdi. Sadaq atýdan segiz, nysana kózdeý jáne stend atýdan on sportshynyń tek ekeýi ǵana júldege ilikti. Zoıa Kravchenko kúmis, Sársenkúl Rysbekova (sýrette) qola medal ıelendi. Sporttyq jáne kórkem gımnastıkadaǵy alty sportshynyń ekeýi kúmis medal ıelense (Narıman Qurbanov pen Mılad Karımı), on dzıýdoshynyń ishinde aýyr salmaqtaǵy Ǵalymjan Qyryqbaı ǵana Ýnıversıadanyń bas júldesin oljalady. Al tennıs jáne júzý sportynan jarysqa qatysqan sportshylardyń qorjyny bos qaıtty.

Bıylǵy Jazǵy Ýnıversıadanyń qorytyndysy boıynsha, 94 sportshymyz 1 altyn, 5 kúmis jáne 1 qola júlde ıelendi. Jalpykomandalyq esepte bizdiń stýdentter 7 medalmen 25-orynǵa turaqtady. Al medal kórsetkishi boıynsha únemi Qazaqstannan keıin turatyn О́zbekstan quramasy  2 altyn, 2 kúmis jáne 4 qola medalmen 19-orynǵa kóterildi. Jalpy komandalyq esep boıynsha bul jyly da Japonııa quramasy birinshi boldy. Kúnshyǵys eli stýdentteriniń enshisinde 82 medal bar (33 altyn, 24 kúmis jáne 28 qola). Reseı Federasııasynyń sportshylary Japonııamen birdeı medal jınaǵanymen, altyn sany boıynsha (22, 24, 36) ekinshi orynda tur. Al úshinshi oryndaǵy Qytaı quramasynyń qorjynynda 43 medal bar (22, 13, 8).

Osydan eki jyl buryn Qytaıǵa qarasty Taıvan provınsııasynyń astanasy Taıpeıde ótken XXIX Jazǵy Ýnıversıada oıyndarynda qazaq sportshylary 16 medal ıelenip, jalpykomandalyq esepte 21-orynnan kóringen bolatyn. Sol jyly stýdent sportshylarymyz 3 altyn, 6 kúmis jáne 7 qolany qurama qorjynyna 
salǵan edi.

Eki jyl saıyn turaqty túrde uıym­dastyrylyp turatyn stýdentterdiń kelesi Ýnıversıada oıyndary 2021 jy­ly Qytaıdyń Chendý qalasynda ótedi.

 

Sońǵy jańalyqtar

Tekeli laı kóshkininen tazartylyp jatyr

Aımaqtar • Búgin, 19:53

Bıyl Almatyda myń jas baspanaly bolady

Aımaqtar • Búgin, 17:44

AQSh-ta shirkeýge shabýyl jasaldy

Oqıǵa • Búgin, 17:15

Batys Qazaqstanda jastar shtaby quryldy

Aımaqtar • Búgin, 16:23

Dollar qymbattady

Qarjy • Búgin, 15:55

Uqsas jańalyqtar