Sport • 22 Shilde, 2019

«Qaırat» pen «Ordabasy» súıintti

93 ret kórsetildi

Qazaqstandyq fýtbol komandalary 2019/2020 jylǵy Eýrokýbok oıyndarynyń alǵashqy irikteý kezeńin aıaqtady. Chempıondar lıgasynda baq synaǵan elordanyń «Astana» klýby birinshi aınalymda Rýmynııanyń ChFR komandasynan jeńilip, Eýropa lıgasyna túsip qaldy. Al Qostanaıdyń «Tobyly» óz alańynda Lıýksembýrgtiń «Jennes» klýbymen teń oınap (1:1), Eýropa lıgasymen qosh aıtysty.

«Astana». Eýrododalardyń sońǵy tórt maýsymynda toptyq kezeńde óner kórsetip júrgen elordanyń «Astana» komandasy bıyl Chempıondar lıgasynyń alǵashqy irikteý kezeńinen óte almaı, Eýropa lıgasyna túsip qaldy. Tarıhqa kóz júgirtsek, «Astana» Eýropa lıgasynyń irikteýi kezeńinde tek 2014 jáne 2015 jylǵy maýsymda ǵana oınaǵan-dy. Endi araǵa tórt jyl salyp, Eýropa lıgasyna qaıta oraldy. Atalǵan týrnırdiń ekinshi irikteý kezeńinde el chempıondary Andorranyń «Santa-Koloma» klýbymen kezdesedi. Eýropa lıgasynyń erejesi boıynsha, alǵashqy match 25 shildede, ıaǵnı aldaǵy beısenbi kúni ótýi kerek bolǵan. Alaıda, «Astana» el chempıonatynyń aıasynda 26 shildede kezekti oıynyn ótkizetindikten, ózara kelisim boıynsha birinshi match 23 shildede oınalatyn boldy. Qarymta match belgilengen ýaqyt boıynsha 1 tamyzda «Astana Arenada» ótedi. 

«Qaırat». Almatynyń komandasy Eýropa lıgasyndaǵy alǵashqy irikteý kezeńin sátti bastady. Bosnııa jáne Gersegovınanyń «Shırokı-Brıeg» klýbymen kezdesken «Qaırat» óz alańynda da, syrt alańda da 2:1 esebimen jeńiske jetti. Ekinshi kezeńde Izraıldiń «Hapoel» (Beer-Sheva) ujymymen kelesi básekeniń joldamasyn sarapqa salady. «Hapoel» týrnırdiń birinshi kezeńinde Albanııanyń «Lıachı» klýbymen kezdesip, eki oıyn qorytyndysy boıynsha 2:1 esebimen jeńip, ekinshi raýndqa ótken bolatyn. 

Ekinshi irikteýde «Qaıratqa» ońaı qarsylas tap keldi dep aıta almaımyz. «Hapoel» 2014/2015 jylǵy maý­symnan beri Eýrokýbok oıyndaryna qatysyp kelse, sonyń ishinde 2016/2017 jáne 2017/2018 jylǵy maýsymda Eýropa lıgasynyń toptyq kezeńinde óner kórsetken. Tipti toptyq kezeńniń alǵashqy maýsymynda ekinshi oryn ıelenip, pleı-off kezeńine deıin jetken. Byltyr Eýropa lıgasynyń úshinshi aınalymynda Kıprdiń APOEL komandasynan jeńilip, jarystan erte shyǵyp ketti. «Qaırat» ta byltyrǵy maýsymdy úshinshi kezeńnen aıaqtaýǵa májbúr bolǵan-dy. Chehııanyń «Sıgma» klýbymen kezdesip, eki oıyn qorytyndysy boıynsha 1:4 esebimen jeńildi. Bıyl eki ujymnyń maqsaty – Eýropa lıgasynyń toptyq kezeńine shyǵý. Eki komanda arasyndaǵy alǵashqy kezdesý 24 shildede Izraılde, qarymta match bir aptadan soń Qazaqstanda ótedi.

«Ordabasy». Shymkettiń klýby araǵa bir jyl salyp Eýropa lıgasyna qaıta oraldy. Byltyrǵy maýsymǵa qarjylyq jaǵdaıyna baılanysty qatysa almaı, ornyna Pavlodardyń «Ertis» komandasy oınaǵan bolatyn. «Ordabasy» Eýropa lıgasynyń alǵashqy irikteý kezeńinen esh qıyndyqsyz ótti. Grýzııanyń «Torpedo» klýbymen kezdesken jerlesterimiz, eki oıynnyń qorytyndysy boıynsha 3:0 esebimen kelesi kezeńge joldama aldy.

Shymkenttiń komandasy ekinshi kezeńde Chehııanyń «Mlada-Boleslav» komandasymen kezdesedi. Eýropa reıtınginde Chehııanyń joǵary orynda turýyna baılanysty bul eldiń komandalary irikteýdi ekinshi kezeńnen bastaıdy. «Mlada-Boleslav» óz elinde tıtýldy komanda sanalmaıdy jáne Eýrokýbok básekelerinde de nátıjesi jaqsy emes. Joǵaryda aıtqanymyzdaı, irikteý satysyn únemi ekinshi kezeńnen bastap, úshinshi kezeńnen ári asa almaı keledi. Qos komanda arasyndaǵy alǵashqy kezdesý 23 shildede Chehııada, qarymta match 1 tamyzda Qazaqstanda ótedi.

«Tobyl». Qazaqstandyq komandalar arasyndaǵy eń nashar nátıje kórsetken jáne birinshi aınalymnan asa almaǵan Qostanaıdyń «Tobyl» komandasy boldy. Lıýksembýrgtiń jartylaı kásipqoı komandalarynyń biri «Jennes» klýbyn jeńe almady. Syrt alańda 0:0 esebimen teń oınap, «Astana Arenada» ótken qarymta matchta da 1:1 esebimen teń tústi. Qonaqtar syrt alańda soqqan jalǵyz golynyń arqasynda kelesi kezeńge joldama aldy. Kezdesýden keıingi baspasóz máslıhatynda «Jennes» bas bapkeri Nıkolas Heısman klýbtyń jyldyq bıýdjeti 500 myń eýro ekenin, tipti fýtbolshylary kúndiz qosymsha jumys isteıtinin aıtty. «Bizdiń bıýdjetimiz «Tobyldan» alty ese kem dep oılaımyn. Sebebi bizdiń jyldyq bıýdjetimiz 500 myń eýro. Bizdiń komanda osydan 13 kún buryn jınalyp jattyǵý jumystaryn bastady. Olardyń kóbisi kúndiz óz jumystarynda júredi de, keshke jattyǵýǵa keledi. Sondyqtan da bizde «Tobylǵa» qarsy daıyndalýǵa kóp múmkindik bolmady», deıdi ol. 

Osylaısha, «Tobyl» fýtbolshylary ózderinen tómen deńgeıdegi komandany jeńe almaı, búkil Eýropaǵa jáne qazaqstandyq jankúıerlerge masqara bolǵan jaıy bar. 

Sońǵy jańalyqtar

Jastar qalaýy – jarqyn keleshek

Referendým-2022 • Keshe

Referendýmdy qoldaýǵa úndeý jasady

Referendým-2022 • Keshe

Aǵa býynnyń aıtary bar

Referendým-2022 • Keshe

Áljannyń kise belbeýi

Tarıh • Keshe

Uqsas jańalyqtar