Qýat kózi artady
Seısenbi, 21 mamyr 2013 1:07
Onyń negizi bolatyn energııa blogy jumysqa tolyq daıyn
Elimizdiń ındýstrııalandyrý kartasyndaǵy iri jobalardyń biri bolyp tabylatyn «EEK» AQ-qa qarasty Aqsý jylý elektr stansııasynyń №6 energııa blogyn qalpyna keltirý jumystary aıaqtalýǵa jaqyn. Nysandaǵy eń iri ári kúrdeli bólikti ornatýdy «Ekıbastýzteploenergomontaj» JShS (ETEM) júzege asyryp, júzderi mereılendi.
Seısenbi, 21 mamyr 2013 1:07
Onyń negizi bolatyn energııa blogy jumysqa tolyq daıyn
Elimizdiń ındýstrııalandyrý kartasyndaǵy iri jobalardyń biri bolyp tabylatyn «EEK» AQ-qa qarasty Aqsý jylý elektr stansııasynyń №6 energııa blogyn qalpyna keltirý jumystary aıaqtalýǵa jaqyn. Nysandaǵy eń iri ári kúrdeli bólikti ornatýdy «Ekıbastýzteploenergomontaj» JShS (ETEM) júzege asyryp, júzderi mereılendi.
«ETEM» JShS jumyskerleri №6 energııa blogynda kezeńdi montajdaý jáne bólshekteý jumystaryn jiti júrgizip, ondaǵy qosymsha qubyrlardy almastyrýmen aınalysyp, aqyry úlken asýǵa abyroımen shyǵyp otyr.
Kásiporyn ENRC quramyndaǵy «Eýroazııalyq energetıkalyq korporasııasy» AQ-men birneshe jyldan beri qoıan-qoltyq jumys isteıdi. Mamandar kezinde №2 energııa blogyn da qalypqa keltirip, qatarǵa qosýmen de aınalysqan.
– «EEK» AQ sııaqty iri kásiporynda jumys isteý – zor jaýapkershilik júkteıdi, – deıdi «ETEM» JShS ýchaske bastyǵy Nurlan Qaıyrbaev. – Bizdiń kompanııa 2007 jyldan bastap EEK-ke qyzmet kórsetip keledi. Bastapqyda ortasha jobalardy oryndap júrdik. Qazir №6 energııa blogynda, mańyzdy ári jaýapty nysanda jumys atqaramyz. Munda jyl boıy myńdaǵan adam eńbek etip, ónege tanytty. Bizdiń ujym barlyq jumysty belgilengen merzimde bitirdi.
Sala mamandary EEK-tiń energııa bloktaryn jańartý jónindegi baǵdarlamasyn biregeı sanaıdy, sebebi ol negizgi óndiristi toqtatpaı júzege asyrylý ústinde. Tolyq tehnıkalyq qaıta jaraqtandyrý júrgizilip, týrboagregat, transformatorlar, generatorlar men elektr súzgiler ornatylady. Avtomattandyrylǵan basqarý júıesi engiziledi.
№6 energııa blogyn qalypqa keltirý 2011 jyly bastaldy. Joba stansııanyń barlyq energııa bloktaryn aýystyrý jónindegi 2001 jylǵy baǵdarlama aıasynda júzege asyrylyp jatyr. №1,2,3 jáne 4 energııa bloktaryn qaıta qalypqa keltirý iske asyrylyp, el ıgiligin kórýde. Bul joba memlekettik ındýstrııalyq-ınnovasııalyq baǵdarlamasyna engizilgen. Sol jumystardyń nátıjesinde energııa blogynyń qýaty 325 MVt qurap, stansııanyń kúshi 2 450 MVt-qa jetedi.
Ornatylǵan jańa qural-jabdyqtar bolashaqta qaıta qalypqa keltirý jumystarynyń zalaldaryn azaıtyp, elektr energııasynyń shyǵynyn jáne qorshaǵan ortaǵa zııandy qaldyqtardy shyǵarýdy aıtarlyqtaı tómendetedi.
– №6 energııa blogyn qalypqa keltirý jumystaryna 250 mln. AQSh dollaryn baǵyttadyq. Jobaǵa 20-daı otandyq merdiger tartyldy. Olardyń kóbi óz jumystaryn jaqsy atqaryp, dittegen mejelerine jetti, – deıdi «EEK» AQ dırektorynyń kúrdeli jóndeýler jónindegi orynbasary Rýstam Ahmetov.
Sonymen, respýblıkadaǵy alyp nysan qurylysyn jańǵyrtyp, qalypqa keltirý tolyqtaı aıaqtaldy dep aıtýǵa ábden bolady.
Marat AQQUL,
«Egemen Qazaqstan».
