Gazetimizdiń ótken sandarynda elordanyń «Astana» klýby men Andorranyń «Santa-Koloma» kezdesýiniń nátıjesin jazǵan bolatynbyz. Sondyqtan bul oıynǵa toqtalmaı, «Qaırat» pen «Ordabasynyń» matchtaryna keńirek sholý jasasaq.
«Qaırattyń» taǵdyry qyl ústinde
«Qaırat» komandasy Izraılge joǵary kóńil kúımen attanǵan-dy. Sebebi ótken aptada óz alańynda Eýropa lıgasynyń alǵashqy irikteýinde «Shırokı-Brıeg» (Bosnııa jáne Gersegovına) klýbyn 2:1 esebimen jeńse, araǵa eki-úsh kún salyp el chempıonatynyń kezekti týrynda Qostanaıǵa sapar shegip, jergilikti «Tobyl» komandasyn 3:5 esebimen tas-talqanyn shyǵardy.
Izraılde ótken oıynda da almatylyq ujymnyń jeńiske jetetinine úmitti bolǵanbyz. Alaıda matchtyń alǵashqy 10 mınýtynda penaltıden soǵylǵan gol «Qaırattyń» oıynyn múlde basqa arnaǵa buryp jiberdi. Dese de gol soǵylǵanǵa deıin bizdiń fýtbolshylar táp-táýir óner kórsetip jatqan-dy. Biraq oıyn shyrqyn 11 metrlik aıyp doby buzdy. Osylaısha kezdesýdiń birinshi taımy jergilikti «Hapoel» klýbynyń basymdyǵymen ótti.
Úzilisten keıin Alekseı Shpılevskıı shákirtteri ujym bolyp alǵa qaraı umtyldy. Qarsylas komandanyń qaqpasyna birneshe qaýipti shabýyl uıymdastyryp, qorǵanysty umyt qaldyrǵandaı boldy. Kezekti qarymta shabýyldyń birinde «Hapoel» oıynshysy Eden Shamır komandasynyń ekinshi golyn soǵyp ketti. Ekinshi taımǵa qosylǵan qosymsha ýaqytta Eldos Ahmetov mergendigimen kózge túsken edi, alaıda tóreshi bul sátte oıyn erejesiniń buzylǵanyn anyqtap, Ahmetovtiń golyn eseptemeı qoıdy. Osylaısha «Qaırat» syrt alańdaǵy alǵashqy oıynda 0:2 esebimen jeńiliske ushyrady. Qos komanda arasyndaǵy qarymta kezdesýi 1 tamyzda, Almatyda ótedi. «Qaırat» kelesi kezeńge shyǵý úshin qarsylas komandanyń qaqpasyna jaýapsyz úsh gol soǵýǵa týra keledi.
«Ordabasy» úshinshi kezeńge jaqyndaı tústi
Qazaqstandyq úsh komandanyń ishinde qazir «Ordabasynyń» jaǵdaıy táýir. О́ıtkeni Chehııada ótken oıynda jergilikti «Mlada-Boleslav» komandasynyń qaqpasyna gol soǵyp, qarymta match aldynda azdaǵan basymdyqqa ıe boldy. Al jalpy kezdesý 1:1 esebimen teń aıaqtaldy.
Oıyndaǵy esepti birinshi bolyp shymkenttik ujym ashty. Matchtyń 21-mınýtynda «Ordabasynyń» bosnııalyq jartylaı qorǵaýshysy Mırzad Mehanovıch gol soǵyp, komandasyn esepte alǵa shyǵardy. Degenmen alań ıeleri birinshi taım aıaqtalǵanǵa deıin esepti teńestirip úlgerdi. 45-mınýtta «Mlada-Boleslav» fýtbolshysy Nıkolaı Komlıchenko mergendigimen tanylyp, esepti 1:1-ge jetkizdi. Ekinshi taımda eki komanda da gol soǵýǵa umtylǵanymen, dop qaqpaǵa darymaı qoıdy.
Endi eki komanda arasyndaǵy qarymta kezdesý 1 tamyzda Shymkenttegi Qajymuqan atyndaǵy ortalyq stadıonda ótedi. Bul oıynda «Ordabasy» komandasyn 0:0 esebi de kelesi kezeńge alyp shyǵady. Biraq jeńisti qoldan shyǵaryp almas úshin shymkenttikterge gol soqqany tıimdi bolady.
Bolashaq qarsylastardyń nátıjesi qandaı?
«Astana» elordada ótetin jaýapty kezdesýde «Santa-Koloma» klýbyn jeńetin bolsa, Chempıondar lıgasynda oınap jatqan «Ferensvarosh» (Vengrııa) – «Valletta» (Malta) jubynyń jeńilgen komandasymen kezdesedi. Eki klýb arasyndaǵy alǵashqy match Vengrııada ótip, «Ferensvarosh» 3:1 esebimen basym túsken.
«Qaırat» – «Hapoel» jubynyń jeńimpazy «Norrchepıng» (Shvesııa) nemese «Lıepaıa» (Latvııa) klýbymen kezdesedi. Alǵashqy kezdesýde Shvesııa komandasy 2:0 esebimen jeńiske jetken bolatyn.
Shymkenttik komanda úshinshi irikteý kezeńinde Rýmynııanyń FKSB (burynǵy «Stıaýa») klýbymen kezdesýi bek múmkin. О́ıtkeni FKSB syrt alańda Armenııanyń «Alashkert» komandasynan 3:0 esebimen basym tústi. Eger qazaqstandyq komandalar úshinshi kezeńge shyǵatyn bolsa, alǵashqy oıynyn 8 tamyzda óz alańdarynda, al qarymta kezdesýlerdi 15 tamyzda syrt alańda ótkizedi.
