Muz aıdynynda jasyndaı jarqyldaǵan Krıstına baıraqty básekede teńdessiz óner kórsetip, jekeleı syndaǵy úsh birdeı qashyqtyqta (500, 1 000, 1 500 metr) top jardy. 1 500 metrlik qashyqtyqta 1.56.06 ýaqyt kórsetkishimen muz aıdynynyń jasóspirimder arasyndaǵy rekordyn jańartty. Eń aýyr sanalatyn 3 000 metrlik saıysta kúmis júlde ıelendi.
Osylaısha, tórt qashyqtyqtyń qorytyndysy boıynsha kópsaıysta jeńiske jetip, el tarıhynda alǵash ret konkımen júgirýden absolıýtti álem chempıony (ISU Junior World Champion) atandy. Buǵan qosa, ulttyq quramamen birge komandalyq sprıntte de altynnan alqa taǵyp, bes dúrkin álem chempıony atandy.
Sportshynyń ómir joly da kópke úlgi. Krıstına Soltústik Qazaqstan oblysy, Shal aqyn aýdanyna qarasty Povozochnoe aýylynda, sportshylar otbasynda dúnıege kelgen. Anasy Iýlııa kezinde jeńil atletıka, júzýmen aınalyssa, búginde Krıstına óziniń syńary Alına, ápkesi Inessamen birge ulttyq qurama sapynda el namysyn qorǵap júr. Analary málim etkendeı, balalary jas kezinde sporttyń ár túrimen, atap aıtqanda, voleıbol, jeńil atletıka, shańǵy syndy túrlerimen shuǵyldanǵan eken. Tek 5-synyptan bastap konkıge birjola den qoıǵan. Jalpy, Iýlııa Mıhaılovna 10 jyldan beri jattyqtyrýshylyqpen turaqty shuǵyldanady. Búginderi birneshe balany jattyqtyryp júr, olardyń arasynda óziniń 8 jasar uly Bogdan da bar.
Aıta keteıik, 2024 jyly Ońtústik Koreıada ótken jasóspirimder Olımpıadasynda Krıstına elimizdiń týyn ustap shyqqan bolatyn.
Bul jeńis – tek bir sportshynyń ǵana emes, búkil eldiń mereıin ústem etken tolaıym tabys. Aıdynda alaýlaǵan jas juldyzdyń aldaǵy eresekter básekesinde de talaı asýlardy baǵyndyratynyna senim mol.
