– Memleket basshysy Qasym-Jomart Toqaev Úkimetke temirjol bıletterine jasandy tapshylyqty, ásirese jazǵy kezdegi jolaýshylar poıyzynda zańsyz bılet satýdy joıýdy tapsyrǵan bolatyn. Bul negizinen halyqqa qolaısyzdyq týǵyzyp, ishki týrızmdi damytýǵa kedergi keltiretinin Prezıdent atap kórsetti. Osyǵan baılanysty Qazaqstannyń Premer-Mınıstri Asqar Mamın Indýstrııa jáne ınfraqurylymdyq damý mınıstrligine jáne «Qazaqstan temir joly» UK» aksıonerlik qoǵamyna bul máseleni shuǵyl sheshý jóninde tapsyrma berdi, – dedi keńesti ashqan IIDM mınıstriniń orynbasary Berik Qamalıev.
Memleket basshysy Úkimetke tapsyrma bere otyryp, týıtterdegi paraqshasynda «Egemende» jaryq kórgen «Qoldan jasalǵan bılet tapshylyǵy» atty maqalaǵa silteme jasaǵan bolatyn.
Sonymen IIDM ótkizgen keńes jumysyna mınıstrliktiń osy salaǵa qatysty qurylymdary men komıtetteriniń basshylary, Sybaılas jemqorlyqqa qarsy is-qımyl agenttiginiń janyndaǵy arnaıy monıtorıngtik top pen «Adal jol» jobalyq keńseleriniń músheleri jáne oblys ákimdikteriniń, barlyq tasymaldaýshylar men temir jol men avtomobıl jolyna qatysy bar mekemeler men uıymdardyń basshylary qatysty.
Keńeste alǵashqylardyń biri bolyp sóz alǵan «QTJ» UK» AQ basqarma tóraǵasynyń birinshi orynbasary Qanat Almaǵambetov jınalǵandardy bılet satý júıesine engizilgen jańashyldyqtar men ózgeristerden habardar etti.
Ulttyq tasymaldaýshy kompanııa ókili jaz mezgilinde poıyz quramdaryna qosymsha vagondar tirkeletinin, suranys joǵary baǵyttarǵa qosymsha poıyzdar shyǵarylyp otyrǵanyn aıtty. Al bılet satý júıesindegi alyp-satarlarmen kúreste shilde aıynan bastap engizilgen «Mobius» júıesine úmit artatyndyqtaryn jetkizdi. Onyń ishinde temirjolshylar «Kútý paraǵy» dep atalatyn ilki qadam bılet satý júıesin deldaldardan tazalaıdy dep senedi.
«QTJ» basshylyǵy jasandy bılet tapshylyǵyna kóbine jeke kassalardyń qatysy baryn jáne olarǵa shara qoldaný óz quzyretterine kirmeıtinin aıtady. Biraq keńeske qatysqan arnaıy monıtorıngtik top músheleri jeke kassalar baqylaýsyz qalmaýy kerek degen pikir bildirip, «QTJ» basshylyǵy da osy ýájben keliskendeı boldy.
Alaıda keńes jumysyna qatysqan Bas kólik prokýrorynyń mindetin atqarýshy Jasulan Elamanov alyp-satarlardyń bul júıeni de aınalyp ótetin jol tapqanyn málimdedi. Prokýrorlar buqaralyq aqparat quraldaryndaǵy maqalalarda keltirilgen derekter boıynsha tekserý júrgizý barysynda Shymkent jáne Almaty vokzaldarynda kassada joq bıletti alyp-satarlardyń satyp júrgenin anyqtap, ustalǵandarǵa shara qoldanǵan.
– Atalǵan derekter maqtaýly «Mobius» júıesin de aınalyp ótip, qıturqylyqtarǵa jol tabylatynyn kórsetip otyr. Qazir bul másele zerdelenip jatyr. Aldaǵy ýaqytta barlyq ýákiletti organdarmen birlese otyryp shara qoldanýdyń amaldaryn qarastyramyz, – dedi J.Elamanov.
Jalpy, el ishindegi bılet tapshylyǵy men jolaýshylardyń narazylyǵy jóninde qoǵamdyq baqylaý uıymdarynyń ókilderi de ótkir syn aıtty. Árıne jýyrda engizilgen maqtaýly «Mobius» júıesine kólik prokýratýrasynyń ózi kúmán keltirip otyrǵandyqtan, «QTJ» tarapynan vokzaldarǵa alaıaqtardy jolatpaý úshin perronǵa tek bıleti bar jolaýshylardy ǵana ótkizýdiń de qareketi jasalmaqshy.
Osy oraıda Q.Almaǵambetov: «Bıyl osy qanatqaqty joba boıynsha elordadaǵy «Nurly jol» vokzaly men Qaraǵandy vokzalynyń perrondaryna bıletsiz adamdardyń jaqyndaýyna shekteý qoıylady. Mundaı bastamany buryn da kótergenbiz. Alaıda qoǵam tarapynan kóptegen narazylyq bolǵan. Bul bastamany quqyq qorǵaý organdary da qoldap otyr. Biz de durys dep sanaımyz. Tym bolmaǵanda iri vokzaldardyń perrondaryna osyndaı shekteý qoıyp bastaý qajet», dedi.
Qoǵamnyń yqpalymen osyndaı ilki qadam jasaýǵa bet alǵan Ulttyq tasymaldaýshy bul jobanyń ómirsheńdigi men kúrdeli jolyn qanshalyqty esepke alyp otyrǵany belgisiz. О́ıtkeni «QTJ» ókili buryn da osyndaı ilki qadam jasaýǵa oqtalǵandarymen, prokýratýra men Ulttyq qaýipsizdik komıteti tarapynan aıtylǵan adamdardyń quqyqtary men qozǵalystaryn shekteýge jol berilmeıdi degen eskertýden soń, jabýly qazandy jabýly kúıinde qaldyra salǵan.
Al qazir tek Ákimshilik quqyq buzýshylyq kodeksiniń 449-baby – «Qoǵamdyq oryndarda tıisý» boıynsha ǵana jaýapqa tartylyp kelgen alyp-satarlardyń dáýreni qashanǵa deıin sozylary da beımálim. Bálkim bul másele bıletke suranys azaıa túsetin qys mezgilinde taǵy umytylyp kete me? Biraq quzyrly oryndar Prezıdent tapsyrmasyn oryndaýǵa bel sheshe kirisken tárizdi.
Serik ÁBDIBEK,
«Egemen Qazaqstan»
