Prezıdent Joldaýy – Májilis depýtattarynyń Batys Qazaqstandaǵy kezdesýleriniń arqaýy
Senbi, 12 qańtar 2013 7:33
Nurlan Nyǵmatýlın: Elbasynyń jańa strategııalyq baǵytyn júzege asyrý árbir qazaqstandyqtyń jańa dáýir tynysyn sezinýine múmkindik beredi.
Halyq qalaýlylary jańa jyldaǵy alǵashqy kezdesýlerin elimiz úshin tarıhı qujatqa aınalǵan Elbasy Nursultan Ábishuly Nazarbaevtyń «Qazaqstan-2050» Strategııasy – qalyptasqan memlekettiń jańa saıası baǵyty» Joldaýyn talqylaýǵa arnady.
Senbi, 12 qańtar 2013 7:33
Nurlan Nyǵmatýlın: Elbasynyń jańa strategııalyq baǵytyn júzege asyrý árbir qazaqstandyqtyń jańa dáýir tynysyn sezinýine múmkindik beredi.
Halyq qalaýlylary jańa jyldaǵy alǵashqy kezdesýlerin elimiz úshin tarıhı qujatqa aınalǵan Elbasy Nursultan Ábishuly Nazarbaevtyń «Qazaqstan-2050» Strategııasy – qalyptasqan memlekettiń jańa saıası baǵyty» Joldaýyn talqylaýǵa arnady.
Qazaqstan Parlamenti Májilisiniń Tóraǵasy Nurlan Nyǵmatýlın Batys Qazaqstan oblysy halqymen jáne eńbek ujymdarymen kezdesti.
Batysqazaqstandyqtar Prezıdenttiń halyqqa Joldaýyn erekshe yqylaspen qabyl aldy. Sebebi, Elbasy usynyp otyrǵan jańa strategııalyq baǵyt búkil elimizge jáne árbir aımaqqa odan ári qarqyndy damýǵa jáne qubylmaly tarıhı jaǵdaıda uzaqmerzimdi turaqty damýǵa qabiletti bolýǵa serpin berip otyr.
Búgingi kúni Batys Qazaqstan oblysy memlekettik jáne halyqaralyq deńgeıdegi iri jobalarda tabysty paıdalanylyp kele jatqan myqty óndirisimen, tabıǵı, kadrlyq potensıalymen maqtana alady. Sondyqtan bolar, Parlament Májilisiniń Tóraǵasy kezdesý ótkizgen batysqazaqstandyq mashına jasaý kompanııasynda (BQMK) qyzý talqylaý ótti. Kezdesý barysynda Prezıdenttiń jańa strategııalyq baǵytynyń ınnovasııa, ındýstrııalandyrýdyń jańa kezeńi, elimizdiń ekonomıkalyq ósýi men odan ári damýy úshin Qazaqstannyń basty baılyǵy retinde resýrstardy paıdalaný, otandyq ónerkásipke mamandar daıyndaý sııaqty ózekti tustaryna erekshe nazar aýdaryldy.
«Prezıdentimiz óz Joldaýynda óte mańyzdy másele – qazaqstandyq kásiporyndarǵa mamandar daıyndaýǵa barynsha nazar aýdarýda. О́ıtkeni, Nursultan Ábishuly Nazarbaevtyń ózi jumysshy mektebinen ótken tájirıbeli adam, sondyqtan, kásibı tehnıkalyq mamandyqtyń qanshalyqty mańyzdy ekenin jaqsy biledi. Bul bizdiń kásiporyn úshin de óte qajet.
Sondyqtan men Elbasymyzdyń ıdeıasyn qoldaı otyryp, kúndelikti jumys barysynda da jas mamandarmen tájirıbemdi bólisýge tyrysamyn», dep óz pikirimen bólisti Batys Qazaqstan mashına jasaý kompanııasynyń kadr jónindegi dırektory, kóptegen jas mamandardyń tálimgeri Vıktor Kýznesov.
Batys Qazaqstan oblysynyń mashına jasaý kompanııasy – oblystaǵy eń iri kásiporyndardyń biri. Qazirgi ýaqytta onyń ónimi kóptegen salalarda, munaı-gaz, qurylys, aýylsharýashylyǵynda joǵary suranysqa ıe. Asa mańyzdy baǵyttarynyń biri – azamattyq jáne áskerı-avıasııalyq qozǵaltqyshtardy jóndeý boıynsha Qazaqstan úshin ınnovasııalyq jáne erekshe bazany uıymdastyrýy. Kásiporyn qyzmetiniń bul túri de elimiz boıynsha biregeı. Aldaǵy ýaqytta kásiporyn joǵary qysymdy sorǵylyq qondyrǵy jóndeý men óndirýdi, azamattyq shaǵyn avıasııa óndirisin meńgerýdi josparlap otyr.
– Prezıdentimiz aıtqandaı, bolashaq – joǵary tehnologııalar jasaýda. Biz onyń elimiz úshin qanshalyqty mańyzdy ekenin jaqsy túsinemiz. Bizdiń mekeme de bir ornynda turǵan joq. Aldaǵy ýaqytta kásiporyn azamattyq shaǵyn avıasııa óndirisin meńgerýdi josparlap otyr, – dedi BQMK №1 óndirisiniń bastyǵy Aqyljan Ahmetov.
Kompanııa jumysshylary Elbasynyń ınnovasııalyq-tehnologııalyq baǵytty qarqyndy damytý qajettigin aıtqan kóregendigi bolashaqqa degen nyq senimderin bekite túskenin jetkizdi. Oǵan aǵa baqylaý sheberi Natalıa Akýtınanyń: «Prezıdentimiz Nursultan Nazarbaev uzaqmerzimdi damý baǵytyn usynyp otyr. Bizdiń basty maqsatymyz – eńbek etý. О́ıtkeni, aldaǵy ómirimizdiń qandaı bolatyny, balalarymyzdyń qalaı ómir súretini bizdiń árqaısymyzǵa baılanysty», degen sózderi dálel bola alady.
Halyqpen kezdesý barysynda Nurlan Nyǵmatýlın Prezıdenttiń «100 mektep, 100 aýrýhana» baǵdarlamasy aıasynda ashylǵan Oral qalasyndaǵy №5 qalalyq emhanasynda da boldy. Búgingi kúni bul medısınalyq mekeme 45 myńǵa jýyq adamdy qamtıtyn qalanyń soltústik-shyǵys aýdany turǵyndaryna qyzmet kórsetedi. Emhanada kásibı medısınalyq kómek kórsetýdiń barlyq jaǵdaılary jasalǵan. Bul jerde túpkilikti nátıjege mejelengen eńbekaqy tóleý engizilýde.
Júzdesý kezinde talqylanǵan taqyryptyń biri – áleýmettik saıasattyń jańa ustanymdary boldy. Onda densaýlyq saqtaý salasyn damytýǵa basa nazar aýdarylǵan.
– Medısına qyzmetkerleri árqashanda Elbasymyzdyń erekshe qamqorlyǵyn sezinip keledi. Jańa aýrýhanalar ashylyp, jańa tehnologııalar engizilýde. Qazaqstandyqtardyń sapaly medısınalyq kómek alýy úshin biz odan ári kásibılikti arttyrýǵa jumyla kirisýdemiz, – dedi №5 qalalyq emhana dırektorynyń medısınalyq járdemdi uıymdastyrý jónindegi orynbasary Indıra Amırova.
Sonymen qatar, medısınalyq qyzmet sapasynyń biregeı standarttaryn engizý, medısınalyq mekemelerdiń materıaldyq-tehnıkalyq jabdyqtaryn biryńǵaılandyrý, Elbasy Joldaýynda aıtylǵan aýrýlar túriniń barynsha keń spektrin dıagnostıkalaý jáne emdeýmen qamtamasyz etý, profılaktıkalyq medısınany jetildirý, «Smart – medısına», qashyqtyqtan profılaktıka jáne emdeý, «elektrondyq medısına» qyzmetterin engizý sııaqty ótkir taqyryptar áńgime ózegine aınaldy.
Oblystyq kópsalaly balalar aýrýhanasy medısınalyq kómektiń sapasyn basqarý jónindegi qyzmet bastyǵy Aleksandr Gehman:
– Ortalyqtan alys jatqan kóptegen aýdandary bar bizdiń oblys úshin Prezıdentimiz aıtqan smart-medısına, qashyqtyqtan emdeý sııaqty medısınalyq qyzmettiń jańa túrlerin engizý óte mańyzdy, – dedi óz sózinde.
Sondaı-aq, aq jeleńdiler Májilis Tóraǵasynan jastarǵa qandaı qoldaý kórsetiledi, bul másele zańdyq turǵyda qalaı sheshiledi, aımaqtyq jáne jahandyq qaýipsizdik problemalary sııaqty ózderin tolǵandyrǵan saýaldarǵa jaýap alyp qalýǵa tyrysty. Osydan keıin Nurlan Nyǵmatýlın kezdesýdi qorytyndylaı kelip: «Elbasymyz Nursultan Ábishuly Nazarbaevtyń «Qazaqstan-2050» Strategııasy Batys Qazaqstan oblysynda da keń qoldaýǵa ıe bolýda. Sebebi, Otanymyzdyń jańa ekonomıkalyq, áleýmettik jáne saıası damý baǵyty elimiz azamattaryna erekshe serpin bergeni sózsiz. Sondyqtan, olar ózderiniń jáne urpaǵynyń jarqyn bolashaǵyn tikeleı osy tarıhı Joldaýmen baılanystyryp otyr», dep óz oıyn túıindedi.
О́ńirge sapar barysynda Nurlan Nyǵmatýlın taǵy da birqatar áleýmettik nysandardy aralady.
Temir QUSAIYN,
«Egemen Qazaqstan».
Batys Qazaqstan oblysy.
Sýretti túsirgender
Rafhat HALELOV,
Aleksandr KÝPRIENKO.
