«Amerıkalyq taraptyń aldyn ala bergen aqparatyna sáıkes, zardap shekkenderdiń ishinde Qazaqstan azamaty joq», - dedi SIM-niń resmı ókili Aıbek Smadııarov.
Aıta ketsek, AQSh-tyń Tehas shtatyndaǵy El-Paso qalasyndaǵy saýda ortalyǵynda atys bolyp, aldyn ala aqparat boıynsha 20 adam qaıtys bolǵan. Taǵy 24 adam ártúrli dene jaraqatyn alǵan.
Dese de, keıbir BAQ kózderi atystan 40 adamnyń zardap shekkenin habarlaıdy.
Atysqa baılanysty 21 jastaǵy jas jigit ustalǵan. Meksıka prezıdenti Andres Manýel Lopes Obradordyń habarlamasyna saı, qaıtys bolǵandardyń ishinde úsheýi meksıkalyq bolǵan.
Budan buryn AQSh prezıdenti Donald Tramp óziniń Twitter paraqshasynda qaıtys bolǵandardyń otbasyna kóńil aıtyp, oqıǵany «tragedııa ǵana emes, qorqaqtyqtyń kórinisi» dep ataǵan bolatyn.
