Aınaladaǵy jyra-saılarda qaıyń, terek toǵaıy ósedi. Seleýli dalanyń kórki jyldyń qaı mezgilinde de júrekke jaqyn. Jaqynda osynda kelgen «Shoqan joldary» qoǵamdyq birlestiginiń tóraıymy Raýshan Imanjúsip Shoqanǵa qoıǵan belgini kórip bala qolymen jasalǵanyn da tanyp, súısinisin jasyra almady.
– Shoqandy taný osyndaı bolsa kerek-ti! – deıdi Raýshan Nurhanqyzy. Bul belgini Qusmuryn stansasyndaǵy №121 Qusmuryn orta mektebindegi oqýshylardyń «Rodnık» ólketanýshylar men tabıǵat dostary toby sonaý 2006 jyly turǵyzǵan eken. Osydan 13 jyl buryn Qusmuryn kóliniń jaǵasyndaǵy shoqyda turyp, top músheleri Shoqanǵa belgi qoıaıyq degen bastama kóteredi.
– Bul keremet, balalardyń perishte kóńilinen shyqqan qasıetti bastama edi! Bárimizge unaǵany sonshalyq, keń dalany jańǵyrtqandaı aıqaılap, dýyldap ketippiz. Dereý iske kiristik. Balalar myna bıik tóbeniń ústine iri tastardy qolmen tasydy, ózenniń tabanynan qum tasydyq, qumtastar terdik, tastardy bekitý úshin sement satyp aldyq. Belginiń nobaıyn jasap, Shoqannyń atyn plıtaǵa jazdyryp, sýretin saldyryp, ornattyq. Árıne, oǵan bızneste júrgen burynǵy jetekshimiz Vıktor Iýrchenko men Qusmuryn stansasyndaǵy deponyń bastyǵy Oralbek Murzaseıitov aǵalarymyz demeýshilik jasady, – deıdi Natalıa Savlevıch. Qazir «Rodnık» ólketanýshy balalar tobynyń jasaǵan belgisine sol tóńirektegi mektep oqýshylary ekskýrsııa jasaıdy, tipti úlken kisiler barsa ǵalymnyń arýaǵyna Quran baǵyshtap ketedi eken.
– Biz belgini ornatyp bolǵan soń, kórshi aýyldan bir aqsaqaldy aparyp, Shoqannyń arýaǵyna Quran oqytqan edik, – deıdi Natalıa Vasılevna. Áńgime, dinı rásimde emes, onyń tárbıelik máninde jatsa kerek.
«Rodnık» toby qurylǵan 34 jyldan beri oqýshylar Qusmuryn óńiriniń tek tabıǵatyn tamashalap, taza ustaýǵa talpynýmen qatar, tanymdyq materıaldar da jınaýmen aınalysty. Olar talaı ret aýyldardaǵy aǵa urpaq ókilderimen áńgimelesti. Qusmurynnan 8 shaqyrym jerde Han jatqan aýylynyń orny bar. Onda Shyńǵys tóre aq orda tikken desedi. Eski jurttan búginge jetkeni Han jatqannyń turǵyndary máńgilik tynystaǵan eski beıit pen áli kúnge quryp ketpeı ósip turǵan kári terek bolatyn. Osy terektiń túbine rodnıktik balalar talaı ret toqtaǵan edi. Olar Qusmuryndaǵy aqsaqaldardan sol terektiń mańynda qudyq bolǵanyn bildi. Bálkim, bala Shoqan da sol qudyqtyń móldir sýyn ishken bolar? Onyń sýymen alǵashqy tyń ıgerýshiler de shólin qandyrypty. Keıin aýyl ketken soń, qudyq ta kómilip qalypty.
Osy eski qudyqty «Rodnık» tobynyń balalary arshyp alady.
– Qudyqty arshý biraz ýaqyt aldy. Biz shatyr quryp, osynda túnedik. Qudyqty keshke deıin arshydyq. Basyn taspen qorshap, bekittik, aınalasyna aǵash otyrǵyzdyq. Qazir olaı-bylaı ótken jolaýshylar qudyqty tamashalaıdy, sýyn alyp kóredi, – deıdi Natalıa Vasılevna.
«Rodnık» toby búginde tabıǵat, sport týrızmderimen, ólketaný, ekologııalyq jumystarymen aınalysady. Jetekshisi Natalıa Savlevıch dene shynyqtyrý páninen sabaq beredi. «Rodnık» qurylǵan 34 jyl ishinde 5 jáne 11 synyp aralyǵyndaǵy 3000 bala onyń múshesi bolypty. Tárbıe degen osy!
Qostanaı oblysy,
Áýlıekól aýdany,
Qusmuryn stansasy
