Jastar jyly aıasynda júzege asqan respýblıkalyq kórmede Nur-Sultan, Pavlodar, Aqtaý, Aqtóbe, Petropavl qalalarynyń kásibı maman retinde endi tanylyp kele jatqan jas sýretshileri óz týyndylaryn kópshilik nazaryna usyndy. Atap aıtsaq, Lıýdmıla Aıtýarova, Dılorom Áshirbekova, Álııa Ámirenova, Gúlbaram Asqarova, Temirlan Ábenov, Nurbolat Bazarbaev, Baqyt Joraev, Gúlnara Daıyrova, Áıgerim Káribaeva, Azamat Nurtazın, Nárkes Imanǵazy, Meıirman Ilııasov, Aıdana Qulahmetova, Valerııa Sergeeva, Ánel Hakimova syndy talantty sýretshiler qatysty.
Sharanyń ashylý saltanatynda sóz alǵan Ulttyq mýzeı dırektory Arystanbek Muhamedıuly: – Elbasymyz N.Á. Nazarbaev 2019 jyldy Jastar jyly dep jarııalaǵan bolatyn. Osyǵan oraı jastardy qoldaý maqsatynda túrli sharalar uıymdastyrylyp jatyr. Jastar – ár memlekettiń keleshegi. Búgingi kórme de talantty jastardy qoldaý úshin ashylyp otyr. Qazaqstannyń óneri dúnıe júzine tanylyp keledi. Jastardy da osy qatarǵa shyǵarǵymyz keledi. Búgingi kórmede olardyń alǵashqy qadamyna kýá boldyq. Keleshekte bul sýretshilerdiń kartınalary úlken halyqaralyq kórmelerdiń tórinde turatynyna kámil senemin, – dep ónerli órenderge aq jol tilep, arnaıy sertıfıkat tabystady.
Kórme ekspozısııasyna beıneleý óneriniń keskindeme, músin, sándik-qoldanbaly óner, sıfrly keskindeme sııaqty túrli janr men san alýan taqyryptaǵy jumystar qoıyldy. Usynylǵan kartınalardan ár sýretshiniń sheberligin, ózine tán qoltańbalyq ereksheligin, stılin aıqyn baıqaýǵa bolady. Daryndy sýretshilerdiń týyndylary atalǵan kórmege tuńǵysh ret usynylyp otyr.
