Kezdesý barysynda Nursultan Nazarbaevqa «Samuryq-Qazyna» aksıonerlik qoǵamynyń damýyndaǵy negizgi óndiristik jáne qarjylyq kórsetkishterge qol jetkizý úshin atqarylǵan jumystardyń nátıjeleri týraly málimdeldi.
Atap aıtqanda, usynylǵan esepke sáıkes, birinshi jarty jyldyqtyń taza paıdasy ótken jyldyń osy kezeńimen salystyrǵanda 50 paıyzǵa artyp, 749 mıllıard teńgeni qurady. Operasııalyq paıda jáne satýdan túsken kiris tıisinshe 492 mıllıard teńgeni jáne 3,3 trıllıon teńgeni qurady, bul 2018 jylǵy kórsetkishten 36 paıyzǵa jáne 12 paıyzǵa kóp.
Elbasy Qordyń oń damyp kele jatqanyna toqtalyp, qazaqstandyqtardyń ál-aýqatyn jaqsartýǵa baǵyttalǵan áleýmettik jobalardy iske asyrýǵa onyń belsendi atsalysýy qajet ekendigin atap ótti.
Qazaqstannyń Tuńǵysh Prezıdenti «Qamqorlyq» bastamasy aıasynda múmkindigi shekteýli balalardy qoldaý máselesine nazar aýdardy.
– Memleket, ákimdikter, úkimettik emes uıymdar jáne bıznes-qoǵamdastyqtar tarapynan erekshe qajettilikteri bar balalardy qoldaý úshin kóptegen jumys atqarylýda. Biraq, qazirgi tańda qyzmet kórsetip kele jatqan ońaltý ortalyqtary naqty qajettiliktiń teń jartysyn da qanaǵattandyra almaýda. Sondyqtan, osy baǵyttaǵy jumystardy kúsheıtý qajet, dedi Nursultan Nazarbaev.
Elbasy óńirlerde qoldanystaǵy ınfraqurylym negizinde kóp beıindi ońaltý ortalyqtaryn qurý, sondaı-aq orta mektepterde ınklıýzıvti bilim berý isin qoldaý maqsatymen qosymsha resýrsty kabınetter ashý qajettigin atap ótti.
– «Samuryq-Qazyna» árdaıym qaıyrymdylyq jobalaryna qoldaý kórsetedi. Sondyqtan, holdıng osy bastamany da júzege asyrýǵa qatysa alady dep sanaımyn, dedi Nursultan Nazarbaev.
Sonymen qatar, Qorǵa elimizdiń shalǵaı óńirlerindegi az qamtylǵan otbasylarynan shyqqan daryndy balalardy qoldaý jáne damytý úshin bilim berý jobalaryn júzege asyrýdy bastaý tapsyryldy.
Sondaı-aq, Elbasy medısınalyq ortalyqtardyń materıaldyq bazasyn jaqsartýǵa jáne salanyń kadrlyq áleýetin arttyrýǵa baǵyttalǵan medısına salasyndaǵy jobalardy júzege asyrýdyń mańyzdylyǵyn atap ótti.
