Osy kúnge deıin aýdanda arqannyń kómegimen úsh júzden astam bala dúnıege kelgen. Analardyń tańdaýymen qoldanylatyn bul tásildiń paıdaly tustary kóp ekenin dáleldep júrgen aýrýhana dárigerleri endi sýda bosaný ádisin de engizýdi josparlap otyr. Aýrýhanany zamanaýı medısınalyq qurylǵylarmen jabdyqtaý jaǵy da umyt qalǵan emes. Bıyldyń ózinde jatyr moıny patologııalaryn anyqtaıtyn «ATMOS iView» kolposkopy, ÝDZ, EKG, travmatologııalyq otalarǵa elektrondy-optıkalyq rentgen, súıekterdiń syrtqy fıksasııasyna arnalǵan «Hoffmann» apparattary, nárestelerdi jasandy tynys aldyrý qurylǵylary, laboratorııalyq analızatorlar ornatylǵan. Jansaqtaý bólimi medısınalyq kópfýnksıonaldy kereýettermen tolyqtyrylyp, stomatologııalyq oryndyqtar jańartylypty. Sonymen qatar oblystyq qoǵamdyq densaýlyq basqarmasynyń basshysy M.Egizbaevtyń qoldaýymen kompıýterlik tomograf apparaty satyp alynyp, ornatylýda. Taıaýda ınsýlt ortalyǵy ashylmaq. Degenmen zamanaýı medısınalyq qurylǵylar ornatylǵan emdeý mekemesinde sapaly dárigerlik qyzmet kórsetetin mamannyń alar orny erekshe ekeni anyq. Bul oraıda, aýdandyq ortalyq aýrýhananyń bas dárigeri Nurǵalı Moldahanovtyń aıtýynsha, dárigerlerdiń elimizdegi ózge de áriptesterimen, sheteldik mamandarmen jıi tájirıbe almasýyna múmkindik jasaıtyn is-sharalar jıi ótkizilip turady. Bir ǵana mysal, ana men bala ólimin tómendetý maqsatynda, «Tıimdi perınataldyq tehnologııalar» taqyrybynda respýblıkalyq ǵylymı-tájirıbelik konferensııa uıymdastyrylǵan. «Bıyl Túrkistan oblysynyń úzdik aýrýhanasy atanǵan medısınalyq uıymda jumys isteıtin 838 qyzmetkerdiń jalaqysy 1 maýsymnan bastap kóbeıip, ótken jylmen salystyrǵanda 30 paıyzǵa artty. Elbasy Nursultan Nazarbaevtyń jáne onyń memleket isindegi sarabdal saıasatyn jalǵastyrýshy Prezıdent Qasym-Jomart Toqaevtyń bul ıgi bastamalary biz úshin úlken demeý. Otandyq medısınaǵa jasalǵan qamqorlyq. Sondaı-aq jalaqynyń ósýi bizdiń jaýapkershiligimizdi arttyrady. Iаǵnı, memleket tarapynan jasalyp jatqan qoldaýlarǵa jaýabymyz halyqqa sapaly dárigerlik qyzmet kórsetý arqyly kórinýi tıis», deıdi bas dáriger Nurǵalı Moldahanov.
Dárigerlerge budan basqa da qoldaýlar kórsetilip keledi. Bas dárigerdiń aıtýynsha, byltyr shalǵaıdaǵy Shardara aýdanynda jumysqa qabyldanǵan 4 jas mamanǵa materıaldyq kómek berilse, 7 qyzmetkerge jańa salynǵan eki qabatty úıden páterlerdiń kilti tabys etilgen. Sonymen qatar dárigerlik qyzmet atqarýǵa aýylǵa kelgen mamandardyń árbirine oblystyq máslıhattyń sheshimimen 1 mln teńgeden qaıtarymsyz kómek kórsetilip kelse, bıyl mundaı qoldaýdyń kólemi 1,5 mln teńge bolyp otyr.
Túrkistan oblysy
