Úı turmysynan bastap, egin jáne mal sharýashylyǵyna jáne qurylysqa qajetti zattardyń túr-túrin aýylda óz aýlasynyń ishinde-aq jasap tabys taýyp otyrǵan aýyldaǵy Moljigitovter óz kásipterin 2006 jyly bastapty.
– Temirden buıym jasaý ońaı sharýa emes, buǵan túrtki bolǵan ne?, – degen saýalymyzǵa Nurqanat: – Shymkenttegi bazarda kúndelikti turmysta, ashanaǵa paıdalanatyn nan sháýli satyp turǵan aǵaıyn aǵamyzdyń: «Qarap otyrǵansha nan sháýli toqyńdar. Qajetti materıaldy berip turamyn. Bul ótimdi taýar», degen aqyly túrtki boldy. Qajetti sym jáne sabyna aǵash materıaldaryn ákelip, úıde otyryp toqı bastadyq. Jasaǵan zatymyzdy ek-úsh aptada aparyp, kelisilgen baǵada aqshasyn alyp kelemiz. Qarap otyrsaq, «tamshydan teńiz quralady» degendeı, tıynnan aqsha qurala bastady. Aqyldasa kele, endi qajetti materıaldy ózimiz alyp, kóterme saýda baǵasymen ótkizeıik degen toqtamǵa keldik. Bul isimiz de jaqsy júrdi. Tipti úlgere almaıtyndaı boldyq. Sodan aýyldaǵylarǵa materıalyn berip, nan sháýli toqyta bastadyq. Bul isimiz de ilgerledi. Munymen shektelip qalmaı, basqa zattar jasaýǵa múmkindigimiz jetetinine tolyq sengen soń, suranysy joǵary qurylys zattaryn jasaýǵa kiristik. Eń bastysy, bizdiń sapaly buıymdarymyzǵa degen suranys joǵary, – deıdi.
Qazir «Nur-Asyl» jaýapkershiligi shekteýli seriktestigin qurǵan Moljigitovter 5 adamdy turaqty jumyspen qamtyǵan. Olardyń ekeýi Muhamedálı Tastanbekov men Erkeǵalı (Sýrette) kórikte qyzdyrylǵan temirden ıip, qajetti qural-saımandardy jasasa, Qajyǵalı Kóshenov, Janar Derbisálıeva, Nurǵısa Ánýarbekuly dánekerleý, árleý, tasymaldaý jumystarymen aınalysady. Al 10 otbasy turaqty túrde nan sháýli toqıdy. Kásipteriniń qanaty qataıyp, aýqymy keńı bastaǵan aǵaıyndy sheberlerge jazǵy sáki, úı turmysyna qajetti qolarba, balalar átkenshegi, jel besik, kıim ilgish, aıaq kıim men gúl sórelerine tapsyrys berýshiler kóp búginde. Sheberler jasaǵan zattaryn Shymkent qalasyndaǵy «Alash», «Qazyna» saýda ortalyqtaryna kóterme saýdamen kelisim boıynsha turaqty túrde ótkizip turady. Endigi kezekte áleýmettik jeli arqyly suranystar qabyldaımyz dep josparlap otyr aǵaıyndy jigitter.
«Alystan arbalaǵansha, jaqynnan dorbala» degendi qazaq bilip aıtqan. Qazir jastardyń kópshiligi mol qarjy tabýǵa qumbyl. Tabý kerek. Biraq qalaı? Kóp aqsha tabamyn degender «shetel asý kerek, dollardy dorbalap alasyń» dep óz paıdasyn oılaǵan alaıaqtarǵa jem bolyp jatyr emes pe? Kózin tapsań, eki qolǵa bir jumys ózimizde de bar. О́z zamanynda uly Abaı «eger mal kerek bolsa, qolóner úırenbek kerek. Mal jutaıdy, óner jutamaıdy. Aldaý qospaı adal eńbegin satqan qolónerli qazaqtyń áýlıesi sol» degen sózi dál qazir de qunyn joıǵan joq.
Al kishkentaı ǵana aýylda óz aýlasynda eńbektiń kórigin qyzdyryp, kásibin dóńgeletip otyrǵan aǵaıyndy jigitterdiń tirligi kim-kimge de úlgi bolarlyq.
Elmıra JAMAShOVA
Túrkistan oblysy,
Báıdibek aýdany
