Maǵynaly da paıdaly basqosý

Beısenbi, 13 maýsym 2013 2:21

Almaty qalasynda «Jas Otan» jastar qanatynyń uıymdastyrýymen «Jetistik formýlasy» atty bıznes-máslıhat bolyp ótti. Bıznestiń jas ókilderiniń ıgi bas­tamasyna «Nur Otan» halyqtyq-demokratııalyq partııasy Tóraǵasynyń birinshi orynbasary Baýyrjan Baıbek qatysty.

Almaty qalasynda «Jas Otan» jastar qanatynyń uıymdastyrýymen «Jetistik formýlasy» atty bıznes-máslıhat bolyp ótti. Bıznestiń jas ókilderiniń ıgi bas­tamasyna «Nur Otan» halyqtyq-demokratııalyq partııasy Tóraǵasynyń birinshi orynbasary Baýyrjan Baıbek qatysty.
Erkin de ashyq sıpatta ótki­zilgen basqosýda kishigirim kásipten bastap, úlken bıznes­ke deıingi jolda bıznestiń jas ókiline kerekti barlyq keńester men naqty tájirıbeler tereń qozǵaldy. Zamanǵa saı isti saýatty júrgizip, naqty jetistikterge jetý úshin bilimdi bolýmen qatar, jańa tehnologııany durys qoldanyp, árbir bıznes ókildiń ınnovasııalyq damý júıesi jóninde oı-oramy myqty bolýy kerek. Mine, bıznestiń aldyńǵy býyny men jas ókilderiniń arasynda qozǵalǵan taqyryp ta, uran da osy boldy.
Baýyrjan Qydyrǵalıuly jastar aldynda Elbasy Nur­sul­tan Nazarbaev búgingi tańda memleketti kórkeıtetin jáne elimizdegi turaqtylyqtyń nyq bo­lýyna yqpal etetin shaǵyn já­ne orta bıznestiń damýy úshin barlyq jaǵdaıdy jasap otyr­ǵanyn, sondaı-aq, otandyq par­tııalardyń ókilderi men jergilikti at­qarýshy oryndardyń jaýapty mamandary jer-jerde Elbasy tap­syrmasynyń oryndalýyn qa­tań qadaǵalap otyrǵanyn jetkizdi.
Sonymen qatar, partııa Tóraǵa­synyń orynbasary óz sózinde Pavlodar jerindegi «Nur Otan» partııasynyń bólimshesi qoldanyp otyrǵan tıimdi tásildi de aıtyp ótti. Máselen, pavlodarlyq jas kásipkerler óz kásibin bastaý úshin qarjy kózin qalaı izdeý, bıznes-jospar jasap kásipti ilgeriletý men jańa jumys ornyn ashý jóninde keńes alyp qana qoımaı, olardyń isin bastaý úshin ınvestor taýyp berý júıesi de jaqsy jolǵa qoıylypty.
Kezdesý barysynda B.Baıbek partııanyń qoǵamdyq qabyldaýyna jastardyń kóptep keletindigin, byltyrǵy jyly respýblıka boıynsha jastar tarapynan toqsan myńǵa tarta usynys tússe, bıyl tek 3 aı ishinde 50 myń jastyń tirkelgenin tilge tıek etti.
Máslıhatqa jıylǵan jastar aldynda Reseıdiń Sankt-Peterbýrg qalasynda óz kásibin bastap, qazirde Taıaý Shyǵys, Germanııa, Úndistan jáne Qazaqstan sekildi birqatar el­diń rynogyn qamtamasyz etip otyrǵan «Arman» OOO-nyń pre­zıdenti, Reseıdiń beldi bıznes­menderiniń biri Serikbaı Bısekeev óziniń jetistikke jetý sheberligimen bólisti.
Budan ózge, Almaty men Atyraý jerinde janarmaı beketterin asha otyryp, kele-kele munaı ónim­derin qaıta óńdeý isimen aınalysatyn múmkindikke qol jetkizgen «Altyn Qyran» kompanııalar tobynyń bas dırektory Islambek Saljanov, elimizdegi ınternet-bıznes assosıasııasynyń dırektory Konstantın Gorojankın, «BCC Invest» kompanııasynyń qarjy dırektory Rústem Qarymov, «Centermarketing» bıznes-júıe­siniń bas dırektory Danııar Nur­ǵazınder óz kásibin jańa bastaý­shy jas býyn aldynda bıznestegi tájirıbeleri men ıdeıalaryn jarııa etip, qazirgi kezde ispen aınalysa júrip bilim jınaqtaýdy da daǵdyǵa aınaldyrý kerektigin alǵa tartty.
Bılik partııasy basshylarynyń birimen jáne alys-jaqyn shet elderde jemisti eńbek etip júrgen beldi bıznesmendermen ótken kezdesý jas býyn ókilderi úshin asa maǵynaly da paıdaly boldy.
ALMATY.
Qanat ESKENDIR,
«Egemen Qazaqstan».
Sýretterdi túsirgen
Aıtjan MYRZANOV.