Taratý ortalyqtarynyń biryńǵaı pýlyn qurý azyq-túlik baǵasynyń turaqtylyǵyn qamtamasyz etedi - B. Sultanov

B. Sultanov atap ótkendeı, azyq-túlik baǵasynyń ósý qaýpin azaıtý maqsatynda basqa eldermen taýarlar qozǵalysyndaǵy kedergilerdi azaıtý jáne sol arqyly saýdaǵa járdemdesý máseleleri boıynsha ekijaqty ózara is-qımyl jumystary júrgiziletin bolady. Mınıstr tutynýshylar úshin taýarlardyń túpkilikti qunyna tasymaldaý shyǵyndary da áser etetindigin atap ótti.

«Biz, mysaly, qyzyl shıe týraly onyń Qazaqstannyń ońtústiginen jáne Ortalyq Azııa elderinen keletinin aıtamyz. Bul jerde shekarada kóptegen máseleler týyndaıdy. 150-200 kólik shekarada turatynyn bilesiz. Máselen, júzim salynǵan tońazytqysh kameralar kele jatqanda, jáne keden qyzmetkerleri ony ashqanda, otteginiń enýiniń ózi 20% joǵaltady deıik. Oǵan qosa, ol (óndirýshi) Nur-Sultan qalasynyń naryǵyna kelip, dıstrıbıýtordy nemese satyp alýshyny tabýǵa tyrysady, osy aralyqta taǵy 20% joǵalady. Jelilerdiń jetilmegendigi – taǵy 20%. Júzim sońǵy tutynýshyǵa jetkenshe, ol bosap qalady», — dedi mınıstr.

Qazirgi ýaqytta jańa mınıstrlik óndirýshilerdiń naqty pýlyn qurý maqsatynda Ortalyq Azııadaǵy áriptesterimen kelissózder júrgizip jatyr. B. Sultanovtyń aıtýynsha, munda qazaqstandyq óndirýshiler de, kórshilerimiz de paıda kóredi.

«Sondyqtan shekaradaǵy barlyq kedergini alyp tastaýǵa múmkindik beretin biryńǵaı dıstrıbýsııa júıesi qurylady. Biryńǵaı júıeniń arqasynda biz baǵa turaqtylyǵyn jáne Qazaqstan naryǵyna ónimdi sapaly jetkizýdi qamtamasyz ete alamyz. Osylaısha, biz baǵanyń uzaq merzimdi aýytqýyn azaıtamyz», — dedi B. Sultanov.

Sonymen qatar ol uzaq merzimdi sıpattaǵy sharalar týraly aıtty. Buǵan saýda jelileri úshin kóterme-taratý saýda ortalyqtaryn qurý jatady.

«Kóterme-taratý satý ortalyqtary týraly aıtatyn bolsaq, bul - jetispeıtin ınfraqurylym elementteriniń biri. Olar ónimdi jetkizý logıstıkasyn, olardy saqtaý jáne úı mańyndaǵy dúkenderge taratý sharalaryn pysyqtaý úshin qajet. Bizde bul jaǵy retke keltirilmegen, búginde bári dıstrıbıýtorlarǵa baılanystyrylǵan. Dıstrıbıýtor bir jerden satyp alady, ózi ákeledi jáne taratady, olar baǵany bizdiń jelilerimizge jáne dúkenderge belgileıdi jáne bir-birimen básekelespeıdi. Sondyqtan biz aıqyn júıeni qurǵymyz keledi», — dedi mınıstr.

Qazirgi tańda Qazaqstanda tórt óńirde — Jambyl, Pavlodar, Batys Qazaqstan jáne Shyǵys Qazaqstan oblystarynda kóterme-taratý saýda ortalyqtaryn salý jumystary júrgizilip jatyr. Mańǵystaý oblysynda kóterme-taratý satý ortalyǵynyń qurylysy 2020 jylǵa josparlanǵan. Aldaǵy ýaqytta úsh óńirde — Aqtóbe, Almaty jáne Semeı qalalarynda taratý ortalyqtaryn salý kózdelgen.

«Búginde úsh óńir kóterme-taratý saýda ortalyqtaryn salýmen aınalysýda. Investorlar men jer telimderi anyqtaldy. Biz óz tarapymyzdan osy nysandardy qarjylandyrýǵa memlekettik qoldaý kórsetemiz», — dedi mınıstr.

Sonymen qatar B. Sultanov jańadan qurylǵan Saýda jáne ıntegrasııa mınıstrliginiń fýnksııalaryna baǵanyń turaqtylyǵy men ónim sapasy máselelerin qadaǵalaý kiretinin atap ótti.